Ես ներկայացրի, որ Նավալնին մեկ բանտարկյալ է, իսկ մեր գերիների ճակատագիրն անհայտ է․ Իգիթյան

Ես ուղիղ կապի մեջ էի ԵԽԽՎ բյուրոյի մի քանի անդամների հետ, և նրանք շատ անհարմար էին զգում, որ չեն կարող այդ հարցն օրակարգ մտցնել մի քանի պատճառներով: Այս մասին այսօր հրավիրված ասուլիսում հայտարարեց ԵԽԽՎ-ում ՀՀ ԱԺ պատվիրակության անդամ Հովհաննես Իգիթյանը՝ անդրադառնալով հարցին, թե ինչու ռազմագերիների հարցը չդարձավ ԵԽԽՎ նստաշրջանի ընթացիկ քննարկման թեմա:

«Պարոն Մարուքյանի հետ նաև քաղաքական խմբում ենք մասնակցել, այնտեղ կատեգորիկ ենք դրել այդ հարցը: Մենք դեմ չենք որևէ քաղաքական կամ ոչ քաղաքական մարդու ազատ արձակմանը, բայց ես այնտեղ ներկայացրի, որ Նավալնին ընդամենը մեկ բանտարկյալ է, և նա իր Ֆեյսբուքում նշել է, որ իր պահման պայմանները այդքան էլ վատը չեն, իսկ մենք ասում էինք՝ Ադրբեջանում կան հարյուրավոր երիտասարդներ՝ իրենց պարտքը կատարած մարդիկ, որոնց ճակատագիրն անհայտ է. սա է պատճառը, որ այս հարցն անպայման պետք է ուշադրության տակ լինի: Խոսքը գերիների մասին. բոլորը համաձայն էին այս պնդման հետ»,- ասաց Իգիթյանը:

Պատգամավորի խոսքով՝ ԵԽԽՎ-ում մթնոլորտը ստեղծվում է նաև Հայաստանից եկած տեղեկությունների հիման վրա: «Հայաստանից գալիս էր ապատեղեկատվական ցունամի, և գերիների հարցն այդ աղմուկի մեջ կորչում էր: Մարդիկ ուրիշ հարցեր էին տալիս, հարցնում էին քաղաքական իրավիճակից, նոր ընտրություններից: Մենք պետք է այնպես անենք, որ այստեղից դուրս եկող տեղեկատվությունը և պատվիրակության աշխատանքը համահունչ լինեն: Նավալնիի հարցը մտավ օրակարգ նաև այն պատճառով, որ նրա մասին այն տեղեկատվությունը, որ Ռուսաստանից դուրս էր գալիս, ավելի մեծ էր, քան այն, ինչ Հայաստանից էր գալիս»,- ասաց Իգիթյանը:

Մանրամասները՝ տեսանյութում: