Տարեկան 100 միլիոն դոլար ենք կորցրել գյուղատնտեսության ոլորտում Արցախի տարածքների կորստի հետևանքով․ Հրաչ Բերբերյան

Արցախում տարածքների կորստին զուգահեռ՝ գյուղատնտեսությունը լուրջ վնաս է կրել։ Եթե, նախնական հաշվարկներով, այդ կորուստը հասնում էր 40-50 միլիոն դոլարի, ապա, այժմյան հաշվարկներով, կորստի չափը հասնում է 100 միլիոն դոլարի։ Այս մասին այսօր լրագրողների հետ հանդիպմանն ասաց «Ագրարագյուղացիական միավորում» ՀԿ նախագահ Հրաչ Բերբերյանը։

Նրա խոսքով՝ նկատելի կորուստ ենք ունեցել ցորենի արտադրության մեջ։

«Մոտ 3 հազար հեկտար այգի ենք կորցրել, մոտ 50 հազար հեկտար ցորենի ցանքատարածություններ ենք կորցրել։ Սոխի լուրջ ցանքատարածություններ ենք կորցրել՝ մոտ 200 հեկտար՝ դա 2000 տոննա սոխ էր։ Հիմնականում այգիները նռնենիներ են եղել, նաև ծիրան ունեինք, դեղձ ունեինք։ 100 հազար տոննա ցորեն մենք ներկրում էինք Լեռնային Ղարաբաղից՝ Հայաստանում անհրաժեշտ պաշարն ապահովելու համար։ Հիմա մոտ 15-20 միլիոն դրամ ավելի պետք է ծախսենք, դրսից ներկրենք»,- նշեց Բերբերյանը։

Նա նաև անդրադարձավ էկոնոմիկայի նախարար Վահան Քերոբյանի հայտարարությանն այն մասին, որ ճանապարհների ապաշրջափակմամբ գյուղատնտեսության ոլորտում փոխադարձ առևտուր կարող է լինել․ «Թուրքիան լոլիկ է արտադրում 70 տոկոս ինքնարժեքով Հայաստանից էժան, Թուրքիայում ջեռուցում չկա, թաղանթի տակ են լոլիկն աճեցնում, մեզ մոտ՝ ջեռուցմամբ։ Ո՞նց ենք մրցելու։ 5 տարի է՝ պայքարում ենք, Կառավարությանը խնդրում ենք, որ մորազգու ցեցը մինչև չվերացնենք, Հայաստանում լոլիկի շուկան չի վերականգվի։ Համառորեն չեն վերացնում։ Ամեն ինչի համար փող կա՝ բացի այդ խնդրի վերացման փողից։ Ի միջի այլոց, ցեցը Թուրքիայից է եկել, Թուրքիայից ներկրվող սերմերից»,- նշեց Բերբերյանը։

Նրա խոսքով՝ եթե այս Կառավարությունը մնա, գյուղատնտեսությունը կշարունակի մեծ վտանգի տակ մնալ․ «Մենք արդեն իսկ չունենք գյուղատնտեսություն։ Քանի-քանի ֆերմերներ են թողել, գնացել։ Մարդիկ կգնան»։