ԵՐԵՎԱՆԻ ԺԱՄԱՆԱԿՈՎ. Եթե իշխանություններն ազգային մտածողություն ունենային, աչքաթող չէին անի թատրոնը. Անուշ Ասլիբեկյան. ՏԵՍԱՆՅՈՒԹ

«Թատրոն պետք է գան առաջին հերթին իշխանավորները: Ես վստահ եմ, որ նաև նրանց՝ թատրոն չգալու պատճառով է, որ ամեն բան տանուլ տրվեց. կրթությունն անկում ապրեց, բարոյական արժեքները հետ մղվեցին: Իշխանավորները թատրոնում երևում էին հազվադեպ, տոնական պրեմիերաներից մեկ-երկուսին գուցե երևացել են»,- Factor.am-ի հետ զրույցում նման տեսակետ է հայտնում թատերագետ, գրող Անուշ Ասլիբեկյանը:

Մեր դիտարկմանը, թե վարչապետ Նիկոլ Փաշինյանը պարբերաբար այցելում էր թատրոն, նա հակադարձում է. «Փաշինյանի կառավարության տարիներն աչքի են ընկնում ցուցամոլությամբ, երկուսուկես տարի նա և իր թիմը «ամսագրի» միայն փայլուն, գլամուրային շապիկը ստեղծեցին՝ դա ներառում էր թատրոն գնալը, համերգին երևալը, իսկ արդյո՞ւնքը, ինչո՞ւ ամեն ինչ կառուցվելու փոխարեն՝ քանդվեց»:

Թատերագետի համոզմամբ՝ Հայաստանն իր անկախությունը երկնքից ստացավ որպես մանանա և չիմացավ՝ ինչպես վարվել դրա հետ։

«Կրթության որակը բարձրացնելու փոխարեն, ով եկավ իշխանության՝ մեկ առաջնահերթություն ուներ՝ հարստահարել, գողանալ։ Այսօր տեղի ունեցածն այդ քաղաքականության արդյունքն է: Այս իշխանության առաջարկած ծրագիրը հուսադրող էր, բայց, ի վերջո, արձանագրեցինք, որ այն ոչնչով չի տարբերվում նախկին իշխանություններից և նույն թելն է թելում՝ արտաքուստ գեղեցիկ, ներքուստ՝ փտած»,- ասաց նա:

Անուշ Ասլիբեկյանը տեսակետ է հայտնում, որ տարիներ շարունակ թատրոնների գոյությունն ապահովվել է, գաղափարական ուղղվածությունը՝ ոչ։

«Եթե իշխանություններն ազգային մտածողություն ունենային, երբեք աչքաթող չէին անի թատրոնը: Այսօր հետպատերազմյան Հայաստանում մենք պետք է բարձրացնենք մեր ազգային ոգին, և այդ խնդիրը պետք է դրվի նաև թատրոնի ուսերին»,- եզրափակում է մեր զրուցակիցը:

Մանրամասները` տեսանյութում:

Աննա Բաբաջանյան