20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Թշնամու օրակարգը ճշգրիտ կատարվում է, հայկականը՝ տապալվել է. Էդմոն Մարուքյան՝ Փաշինյանի մոսկովյան այցի մասին. ՏԵՍԱՆՅՈՒԹ
Քաղաքականություն
12.01.2021 | 13:06
Նոյեմբերի 9-ի հայտարարության մեջ կային դրույթներ, որտեղ խոսվում էր ապաշրջափակման մասին. ակնհայտ է, որ այդ դրույթները հայկական լոբբինգի արդյունք չեն, ակնհայտ է, որ այդ դրույթները ներմուծվել են փաստաթուղթ, որովհետև մենք պարտվել ենք պատերազմում: Այս մասին, այսօր՝ հունվարի 12-ին, ԱԺ-ում լրագրողների հետ զրույցում նշեց «Լուսավոր Հայաստան» խմբակցության ղեկավար Էդմոն Մարուքյանը:
«Ըստ էության, դա թշնամու օրակարգն է և այդ օրակարգը շարունակվում է գերակշռել հայկական օրակարգին: Այս պահին Հայաստանի շահերից բխող թիվ մեկ օրակարգային հարցը ռազմագերիների և քաղաքացիական անձանց փոխանակման հարցն էր, որոնք գտնվում են գերության մեջ Ադրբեջանում: Մեզ հրապարակային ասվել է, որ մոսկովյան այցի նպատակը սա է: Վերջում ստորագրվում է փաստաթուղթ, որտեղ ռազմագերիների մասին խոսք չկա, ոչ մի պարտավորություն չի ստանձնվել: Այսինքն՝ ոյեմբերի 9-ի փաստաթղթի 8-րդ կետը չի իրացվում: Մնացած բոլոր կետերը, որոնք մեր օրակարգը չեն, օրինակ Քելբաջարից դուրս գալ, Լաչինի միջանցքը հանձնել, բոլոր այդ կետերը իրացվել և իրացվում են ճշգրտորեն:
Ես տեսնում եմ իշխանական պատգամավորների հրճվանքը, որ տեսեք, ինչ լավ բան է եղել: Հիմա հարց է առաջանում, հայ ժողովուրդը տենչում էր, որ Ադրբեջանի տարածքով երկաթգծով գնար Ռուսաստա՞ն: Եթե չեմ սխալվում, անգամ Մառնեուլի ադրբեջանական գյուղերով անցնելիս կրակել են հայկական բեռնատարների վրա:
Ես կարծում եմ, որ հայկական օրակարգը Մոսկվայում տապալվել է, հայկական օրակարգով հարց չի քննարկվել:
Անգամ եթե դիտարկենք, ըստ ադրբեջանական հայտարարությունների, որ 62 անձանց չեն համարելու ռազմագերի, և ցանկանում են նրանց դուրս դնել Ժնևյան կոնվենցիայից և քրեական գործերով դատել այդ մարդկանց, ապա երեկ Մոսկվայում գոնե մնացյալ ռազմագերիների մասով պետք է լիներ համաձայնություն, որ Ադրբեջանը համաձայներ մեզ հանձնել այն ռազմագերիներին, որոնք մինչև նոյեմբերի 9-ն էին հայտնվել ադրբեջանական գերության մեջ: Ինչ վերաբերում է նոյեմբերի 9-ից հետո գերության մեջ հայտնվածներին, այդ հարցը քննարկվեր: Գոնե այդքանը արվեր: Դա էլ չի հաջողվել անել», -ասաց Մարուքյանը՝ հավելելով, որ ակնհայտ է, որ այդ ռազմագերիները պահվում են Հայաստանին ճնշելու համար:
Մանրամասները՝ տեսանյութում:
