18.12.2025 | 23:24
ՀՀ տարածքում ավտոճանապարհները հիմնականում անցանելի են
Ունենք փաստեր, երբ տենդերը հաղթում է անհասկանալի կառույց. Կարեն Կարապետյան
Տնտեսություն
18.01.2018 | 12:26
Կառավարության այսօրվա նիստում վարչապետ Կարեն Կարապետյանը հանձնարարական տվեց Տրանսպորտի, կապի և տեղեկատվական տեխնոլոգիաների նախարարին և Քաղաքաշինության պետական կոմիտեի նախագահին ճանապարհաշինության և հիմնանորոգման ոլորտում նախաորակավորման ինստիտուտի ներդրման վերաբերյալ:
«Ներկայումս գործող կառավարման արդյունքում ճանապարհաշինության և ճանապարհների հիմնանորոգման ոլորտում գնումների գործընթացն իրականացվում է առանց նախաորակավորման փուլի, ինչի արդյունքում նախագծային, տեխնիկական հսկողության և շինարարական աշխատանքները գործնականում առաջացնում են որոշակի խնդիրներ:
Նման խնդիրների ռիսկը նվազագույնի հասցնելու նպատակով միջազգային փորձում գնումների գործընթացում լայնորեն կիրառվում է նախաորակավորման ինստիտուտը»,- ասաց Կարապետյանը:
Հաշվի առնելով վերոնշյալը՝ կառավարության ղեկավարը հանձնարարեց Տրանսպորտի, կապի և տեղեկատվական տեխնոլոգիաների, Ֆինանսների նախարարներին և Քաղաքաշինության պետական կոմիտեի նախագահին մեկամսյա ժամկետում մշակել և կառավարության աշխատակազմ ներկայացնել ճանապարհաշինության և ճանապարհների հիմնանորոգման ոլորտում, ինչպես նաև ըստ անհրաժեշտության պետական գնումների այլ ոլորտներում համապատասխան գործընթացում նախաորակավորման ինստիտուտը ներդնելու վերաբերյալ առաջարկություններ:
«Այս մոտեցմանը դեմ է ֆինանսների նախարարությունն՝ ասելով, որ հնարավոր է մենք էժան լուծումները բաց թողնենք, բայց մենք առանց նախաորակավորման, ունենք փաստեր, երբ տենդերը հաղթում է անհասկանալի կառույց, որը համապատասխան հմտություն չունի: Մենք պետք է այս երկու մոտեցումների մեջ լավագույն կետը գտնենք»,- եզրափակեց Կարապետյանը:
