15.10.2026 | 00:05
NATO-ի նավատորմին ծառայություններ մատուցող ընկերությունը կասկածվում է 1 միլիոն եվրոյի խարդախության մեջ
Ակնկալում ենք որոշակի աշխուժություն շինարարության ոլորտում. վարչապետ
18.01.2018 | 11:43
ՀՀ վարչապետ Կարեն Կարապետյանն այսօր ևս կառավարության հերթական նիստը սկսեց հանձնարարականներով, որոնցից մեկը վերաբերում էր շինարարության ոլորտի վարչարարությանը:
«2017 թվականի ընթացքում հատկապես տարվա վերջին շինարարության ոլորտում արձանագրվեց աճ և առաջիկայում ակնկալում ենք այդ տեմպերի ավելացում: Գործարարությամբ զբաղվելու 2018 թվականի զեկույցում անդրադարձ էր կատարվել շինարարական թույլտվությունների տրամադրման ոլորտին և արձանագրվել են որոշակի խնդիրներ»,- նշեց Կառավարության ղեկավարը՝ հավելելով, որ այդ կապակցությամբ 2017 թվականի նոյեմբերին տրվել էր համապատասխան հանձնարարական:
Միաժամանակ իրականացված ուսումասիրությունների և կառուցապատողների հետ հանդիպումների արդյունքում, ըստ Կարապետյանի, առաջացել է շինարարության ոլորտում առկա վարչարարության՝իրավական ակտերով նախատեսված ընդհանուր պահանջների պարզեցման և հստակեցման անհրաժեշտություն:
«Հաշվի առնելով դա՝ հանձարարում եմ Տարածքային կառավարման և զարգացման նախարարին, Քաղաքաշինության պետական կոմիտեի նախագահին, մարզպետներին և առաջարկում եմ Երևանի քաղաքապետին մեկամսյա ժամկետում մշակել շինարարության ոլորտի ամբողջ գործընթացի հստակեցման և իրավասու մարմինների վարչարարության թույլտվությունների, եզրակացությունների տրամադրման կարգերի պարզեցմանը, հայեցողական լիազորությունների հստակեցմանն ուղղված առաջարկությունների փաթեթ և ներկայացնել կառավարության աշխատակազմ»,- հանձնարարեց Կարեն Կարապետյանը:
Բացի այդ, կառավարության ղեկավարը աշխատակազմի ղեկավարին և Քաղաքաշինության պետական կոմիտեի նախագահին հանձնարարեց տասնօրյա ժամկետում կառուցապատողների, ներդրողների մասնակցությամբ կազմակերպել խորհրդակցություն՝ նախապատրաստելով բոլոր շահագրգիռ կառույցներին:
«Այստեղ մենք ակնկալում ենք 2018 թվականին որոշակի աշխուժություն շինարարության ոլորտում: Պետք է մաքսիմալ լսել՝ ինչն է իրենց խանգարում և շատ պարզ մեխանիզմ դնել, որը տարբեր մեկնաբանությունների ճիշտ տեղիք տա»,- եզրափակեց վարչապետը:
