ՌԴ-ն ու Բելառուսը պայմանավորվել են նավթի ու գազի սակագնի վերաբերյալ․ ՌԻԱ Նովոստի

Մինսկն ու Մոսկվան պայմանավորվել են 2021 թվականին Բելառուսին նավթի ու գազի մատակարարումների շուրջ։ Այս մասին հայտարարել է Բելառուսի վարչապետ Ռոման Գոլովչենկոն, գրում է «ՌԻԱ Նովոստին»։

«Ինչպես միշտ, ցանկացած տեսակի բանակցություններ ուղեկցվում են պայմանների որոշակի սակարկությամբ: Բայց սկզբունքորեն Բելառուսի համար ամեն ինչ ավարտվեց լավ, բարենպաստ պայմաններով», – ասել է նա:

Հինգշաբթի օրը «Գազպրոմի» գործադիր տնօրեն Ալեքսեյ Միլլերը և Բելառուսի էներգետիկայի նախարար Վիկտոր Կարանկևիչը արձանագրություն էին ստորագրել 2021 թվականին ռուսական գազի գինը սահմանելու կարգի վերաբերյալ: Միևնույն ժամանակ, գինը ուղղակիորեն չի նշվել: Այս տարի այն կազմում էր 127 դոլար հազար խորանարդ մետրի համար, բայց Մինսկը պնդում է, որ այն պետք է իջեցվի: Ավելի ուշ Բելառուսի էներգետիկայի նախարարությունը հստակեցրել է, որ այն «գործնականում կլինի ներկայիս մակարդակի վրա»:

Ինչ վերաբերում է նավթին, Գոլովչենկոն հայտարարել էր, որ հաջորդ տարվա բոլոր պայմանագրերը կստորագրվեն մինչև դեկտեմբերի վերջ, իսկ որոշ խոշոր ռուսական մատակարարների հետ արդեն կնքված են պայմանագրեր:

Նշենք, որ կողմերից և ոչ մեկը չի հայտարարել որոշակի սակագին:

Հիշեցնենք՝ Հայաստանի և Բելառուսի ղեկավարները  Եվրասիական տնտեսական միության շրջանակներում առաջարկել էին մինչև 2025 թվականը զարգացման ռազմավարության ծրագրում «ոչ խտրական» մոտեցում արձանագրել, այսինքն՝ գազի փոխադրման և տարանցման միասնական սակագին սահմանել՝ անկախ ծագման երկրից: Սակայն այս առաջարկը մերժվել է ՌԴ կողմից։ ԵԱՏՄ հեռավար գագաթնաժողովում Վլադիմիր Պուտինը մերժեց Նիկոլ Փաշինյանի և Ալեքսանդր Լուկաշենկոյի առաջարկը՝ հայտարարելով, որ գազի միասնական սակագին կարելի է մտցնել, եթե հասնեն ինտեգրման որոշակի մակարդակի՝ միասնական շուկա, միասնական բյուջե, միասնական հարկային համակարգ: Այլ կեպ ասած՝ սկզբում՝ խորը ինտեգրում, հետո՝ գազի գին:

Տաթև Ֆռանգյան