08.02.2026 | 22:09
Չեխիայի իշխանությունները ցանկանում են երեխաներին արգելել օգտվել սոցիալական ցանցերից
Հնդկաստանն ու Չինաստանը պատերազմի եզրի՞ն․ երկու ամենահզոր զինված ուժերը մարտական պատրաստի վիճակի են բերվել․ The Times
Քաղաքականություն
29.12.2020 | 15:03
Ասիական երկու գերտերությունների միջև տասնամյակներ շարունակվող ամենավտանգավոր դիմակայության հետևանքով Հնդկաստանն ու Չինաստանը Հիմալայների բարձունքում զորքերը մարտական վիճակի են բերել՝ ներգրավելով հրետանի, զրահատեխնիկա ու ավելի քան 100,000 զինծառայող, գրում է The Times-ը։
Պարբերականը նշում է, որ հազարավոր չինացի զինվորներ տեղակայվել են հնդկական հողի վրա․ աշխարհի երկու ամենահզոր զինված ուժերը 5000 մ-ից ավելի բարձրության վրա միմյանց դեմ են դուրս գալիս բանակցություններ վարելու` հակամարտությունը փակուղուց հանելու համար, մինչդեռ բարձունքում ջերմաստիճանը հասնում է – 40C:
Տարածքային վեճը սրվել է այն բանից հետո, երբ այս տարի սահամանային միջադեպի արդյունքում զոհվեց 20 հնդիկ ու անհայտ թվով չինացի զինվոր։ Դիմակայությունը մտավախություններ է առաջացրել, որ կողմերից մեկի սխալ հաշվարկը կարող է բաց բախման հանգեցնել միջուկային զենք ու շուրջ 2.7 միլիարդ բնակչություն ունեցող երկու երկրների միջև։
Ըստ որոշ գնահատականների՝ մայիսին չինական զորքերը մի քանի վայրերում հատել են Լադախի վիճելի լեռնային սահմանը՝ Գալվան հովտում և Պանգոնգ լճի շրջանում գրավելով ռազմավարական դիրքեր, արդյունքում Հնդկաստանը հակառակորդին զիջել է ավելի քան 250 քառակուսի կիլոմետր ռազմավարական կարևոր տարածք:
Հոդվածագիրը նշում է, որ այժմ վտանգի տակ է հայտնվել Կարակորամի լեռնանցքով Մետաքսի ճանապարհը, որը կարող է ավելի բարենպաստ ճանապարհ բացել Չինաստանի Սինցզյան նահանգից դեպի Պակիստան ՝ Հնդկաստանի դարավոր մրցակից երկիր: Չինաստանի ներդրումները Պակիստանում և դեպի Կենտրոնական Ասիայի առևտրային միջանցք կազմում են միլիարդավոր դոլարներ։ Այս ներդրումներն առանցքային են նախագահ Սի Ծինփինի «Գոտի և ճանապարհ» ծրագրի կյանքի կոչման համար: Հյուսիսային սահմանների երկայնքով շրջապատված լինելով Պակիստան-Չինաստան դաշինքի ուժերի կողմից, Հնդկաստանի ազդեցությունը Լադախի և վիճելի Քաշմիրի շրջանի վրա կարող է թուլանալ:
«Չինաստանի համար սա աննախադեպ քայլ էր։ Չնայած Հնդկաստանի տնտեսությունում իր հսկայական մասնաբաժնին, նրանք գնացել են այդ թշնամական էքսպանսիային։ Դա, անշուշտ, կապված է գլոբալ քաղաքականության հետ։ Հնդկաստանը, հնարավոր է, պրոքսի թիրախ է եղել ԱՄՆ-ին պատասխան հարված հասցնելու համար, որը Թրամփի օրոք ավելի ագրեսիվ դիրք է գրավել Չինաստանի նկատմամբ»,- ասել է հնդկա-չինական հարաբերությունների փորձագետ Փունչոկ Սթոբդանը:
Տաթև Ֆռանգյան
