12.01.2025 | 14:16
Առաջիկա օրերին օդի ջերմաստիճանն էապես չի փոխվի
Ռուստամ Բադասյանը ԲԴԽ հայտարարությունն ու դատարանի որոշումը ՀՀ քաղաքացու դեմ գործողություն է որակում
Հասարակություն
28.12.2020 | 15:42
Արդարադատության նախարար Ռուստամ Բադասյանը Հայաստանի յուրաքանչյուր քաղաքացու դեմ ուղղված գործողություն է համարում Երևանի առաջին ատյանի ընդհանուր իրավասության դատարանի կողմից օրեր առաջ Հանրապետության հրապարակում կայացած հանրահավաքի ընթացքում զինված հեղաշրջում կատարելու և արյուն թափելու կոչ արած անձի՝ քրեական գործով որպես մեղադրյալ ներգրավված Ս. Կ․-ի նկատմամբ կալանքը, որպես խափանման միջոց ընտրելու վերաբերյալ նախաքննական մարմնի միջնորդությունը մերժելը, ինչպես նաև Բարձրագույն դատական խորհրդի հայտարարությունն այդ առնչությամբ:
«Բարձրագույն դատական խորհրդի ֆեյսբուքյան էջի վարողը սրամտում է։
Երևի շատ զվարճալի է թվում ստեղծված իրավիճակը, երբ դատարանի կողմից չեն պաշտպանվում քաղաքացու հիմնարար իրավունքները և ազատությունները։
Եթե ինչ-որ մեկին թվում է, որ սա ուղղված է գործող իշխանության դեմ, ապա չարաչար սխալվում է․ սա գործողություն է ուղղված Հայաստանի յուրաքանչյուր քաղաքացու դեմ։
Իրականում նման հայտարարությունները դատական համակարգում սեփական ինքնաոչնչացման տպավորություն են ստեղծում, ինչը բացի քաղաքացիներից, հենց դատավորներին պետք է մտահոգի։
Հ․Գ․ Գիտեմ, հիմա կասեք վեթինգը բա չարեցիր, դրա համար խնդրում եմ նայել հարցազրույցի այս հատվածը, իսկ ԲԴԽ ֆեյսբուքյան էջի գրառումը՝ մեկնաբանություններում է»,- Բադասյանը գրել է Ֆեյսբուքի իր էջում, արձագանքելով Բարձրագույն դատական խորհրդի աշխատակազմի մամուլի և հասարակայնության հետ կապերի ծառայության պետ Արման Խաչատրյանի գրառմանը, որը հետևել էր Գլխավոր դատախազի խորհրդական Գոռ Աբրահամյանի հրապարակմանը:
Գոռ Աբրահամյանը սոցիալական ցանցի իր էջում նշել էր, որ այդ որոշումը դատարանը կայացրել է մի իրավիճակում, երբ հրապարակում հայտարարությունն արվել է ուղիղ և բաց տեքստով, առանց այլևայլությունների, առանց որևէ երկիմաստության, մեկնաբանելիության տեղ չթողնելով։
Ի պատասխան Գոռ Աբրահամյանի գրառմանը, Բարձրագույն դատական խորհրդի աշխատակազմի մամուլի և հասարակայնության հետ կապերի ծառայության պետ Արման Խաչատրյանն ընդգծել է, որ դատախազությունն այն մարմինն է, որը լավագույնս է տիրապետում իր կարծիքով ոչ իրավաչափ դատական ակտերի բողոքարկման հնարավորությունների ողջ գործիքակազմին, սակայն, այնուամենայնիվ, տվյալ պարագայում ընտրել է «ֆեյսբուքյան» արդարադատությունը:
«Ակամա հարցեր են առաջանում. այսուհետ նման ձևաչափը համարել ընդունելի՞: Եթե այո՛, այդ դեպքում խնդրում եմ հրապարակել դատական ակտերի ցանկ, որոնց կապակցությամբ հակված եք համացանցում հանրային քննարկումներ ծավալել»,- նշել է Խաչատրյանը:
