16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Անհարմար եմ զգում, որ պաշտպանության նախարարը պետք է կոչ անի՝ բարեգործական հիմունքներով հոգալ զինվորի առողջության ծախսերը․ իրավապաշտպան
Հասարակություն
16.01.2018 | 20:09
Իրավապաշտպան Ավետիք Իշխանյանը, անդրադառնալով Վիգեն Սարգսյանի ֆեյսբուքյան աղմկահարույց դրամահավաքությանը, նշում է, որ այդ նախաձեռնությունը քննադատող քաղաքացու կողմից «բոշա» արտահայտությունը գեղեցիկ չէ, սակայն օգտատերը արտահայտվել է ընդհանուր, նախարարին չի վիրավորել, մինչդեռ նախարարն անձամբ նրան է անվանել «բոշա», թեպետ պետական պաշտոնյան պետք է ավելի զուսպ լիներ:
«Ինչ վերաբերում է կոչին, ես անհարմար եմ զգում, որպես ՀՀ քաղաքացի, որ պետությունը չունի գումար, որ հոգա ծանր վիրավորում ստացած զինծառայողների բուժման ծախսերը։ Ես անհարմար եմ զգում, որ պաշտպանության նախարարը պետք է կոչ անի, որ բարեգործական հիմունքներով հոգան զինվորի առողջության ծախսերը»,- նշեց Իշխանյանը։
Անդրադառնալով ցմահ ազատազրկման դատապարտված քաղաքացիների խնդիրներին՝ իրավապաշտպանը նշեց. «Ցմահ ազատազրկվածների հիմնախնդիրներին չանդրադառնալու քաղաքական որոշում կա»:
Ըստ Իշխանյանի՝ «Անկախ հանձնաժողովի» անկախությունը կասկածահարույց է: «Անկախ բառն իմ մեջ քմծիծաղ է առաջացնում։ Հայաստանում շատ կան նմանատիպ «անկախ» մարմիններ, անունով անկախ՝ Քննչական կոմիտեն, ՀՔԾ-ն, դատարանները և այլն։ Այդ անկախների շարքին է դասվում նաև «Անկախ հանձնաժողովը», բայց որոշումները կայացնում է նախագահականը»,- եզրափակեց իրավապաշտպանը։
Մանրամասները՝ տեսանյութում:
Լիլիթ Շաբոյան
