18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Մեր պայքարը մեր երեխաների համար է․ գերեվարված շիրակցիների հարազատները կրկին ճանապարհներ են փակել
Հասարակություն
18.12.2020 | 13:57
Արցախի Խծաբերդ ու Հին Թաղեր բնակավայրերում գերեվարված կամ անհետ կորած կամավորների, զինծառայողների հարազատներն այսօր կրկին փակել են Երևան-Գյումրի ճանապարհը, նախ՝ Ազատանի, հիմա՝ Հոռոմի հատվածը։ Նրանք տեղեկություններ են պահանջում իրենց հարազատներից։
Ակցիայի մասնակիցներից մեկն ասաց՝ իրենց երեխաներին են պահանջում։
«Գան, իմանանք մեր երեխաների վիճակն ինչ է լինելու։ Մեր պայքարը մեր երեխաների, մեր գերի ընկածների համար է։ Մեր երեխաներին ազատեք, բերեք։ Դուք ձեր աթոռների, մենք՝ մեր երեխաների մասին ենք մտածում։ Քայլեր ձեռնարկեք»,- վրդովված ասաց հարազատներից մեկը՝ ընդգծելով, որ իրենք վարչապետի դեմ չեն պայքարում։
«3 ամիս է՝ իմ երեխայից խաբար չունեմ։ Թող մեր երեխաներին բերեն, տան մեզ, բոլոր ծնողները դրա համար են ելել։ Իսկ մեծերը իրանց համար ուտում-խմում են, երեխաների մասին չեն մտածում։ Բերեն, մեր երեխաներին տան մեզ»,- ասաց ակցիայի մեկ այլ մասնակից։
Հիշեցնենք, որ ավելի վաղ գերեվարված կամ անհետ կորած կամավորների, զինծառայողների հարազատները Շիրակի մարզում կրկին ճանապարհներ էին փակել։ Արդեն մի քանի օր նրանք պարբերաբար հանդիպումներ են ունենում Շիրակի մարզպետարանում։ Երեկ երեկոյան նրանց ընդունել է մարզպետ Տիգրան Պետրոսյանը։ Նա մի շարք հանդիպումներ է ունեցել Երևանում, սակայն նշել է, որ գերեվարվածների ու անհետ կորածների մասին դեռևս ստույգ տեղեկություններ չկան։
Այսօր էլ Շիրակի մարզպետարանում հարազատները հանդիպելու են ՀՀ ՄԻՊ Արման Թաթոյանի հետ։
Էմմա Չոբանյան
