19.01.2026 | 23:38
Ռուբիոն բարձր է գնահատել Ադրբեջանի կառավարության կողմից Հայաստան վառելիքի մատակարարումները
Շիրակի մարզի ՄՈԲ-ի զինծառայողները Հին թաղեր գյուղում շրջափակման մեջ են հայտնվել․ Սարապատի համայնքապետ
Հասարակություն
16.12.2020 | 14:06
Շիրակի մարզի Սարապատ համայնքի ՄՈԲ զինծառայողներից 8-ը Արցախի Հադրութի շրջանի Հին թաղեր գյուղում շրջափակման մեջ են հայտնվել։ Այս մասին Factor.am-ին տեղեկացրեց Սարապատ համայնքի ղեկավար Արտուշ Մանուկյանը։
Նա տեղյակ չէ շրջափակման մեջ հայտնված զինծառայողների ընդհանուր թվի մասին, սակայն նշում է՝ 8-ը իրենց համայնքից են։ Նրանց հետ վերջին անգամ կապի մեջ են եղել 2-3 օր առաջ։
«Գերության մասին ես հստակ ինֆորմացիա չունեմ, ծնողներն են ինտերնետում նկարներ տեսել, նմանեցրել են ու դիմել։ Ղեկավարությունը տեղյակ է, զինվորական ղեկավարությունն էլ է տեղյակ, ցուցակները բոլորին ուղարկվել է՝ և՛ զորամասից, և՛ զինկոմիսարիատից, և՛ համայնքից։ ՊՆ-ի հետ էլ ենք կապվել, Հադրութի տարածքում կանոնակարգողների հետ էլ ենք կապվել։ Իրենք ասում են՝ ընդամենը կապ չկա մառախուղի պատճառով, կճշտենք, ինֆորմացիա կտանք։ Բացի դրանից՝ ռուս խաղաղապահներն այդ տարածքին տիրապետում են, իջնում են ներքև, որպեսզի իրենց գտնվելու վայրը ապաշրջափակեն»,- նշեց Մանուկյանը։
Նշենք, որ այսօր մի խումբ գյուղացիներ փակել են Շիրակի մարզի Քեթի գյուղ տանող ճանապարհը։ Նրանք հայտարարում են, որ ադրբեջանական կողմի տարածած տեսանյութերի մեջ տեսել են իրենց հարազատներին՝ գերության մեջ։ Ցուցարարներն իշխանություններից պարզաբանում են պահանջում։ Այսօր նաև ակցիա է տեղի ունեցել Շիրակի մարզպետարանի շենքի դիմաց։
Անժելա Պողոսյան
