Քաղաքականություն
15.01.2018 | 16:19
«Հայաստանի Հանրապետությունում շատ դժվար է գտնել որևէ քաղաքական թիմ, որն ավելի շատ է պայքարել պատճառների դեմ»,- արձագանքելով այս օրերին հնչող մեղադրանքներին, որ «Ելք»-ը թանկացումների պատճառները թողած՝ թանկացումների դեմ է պայքարում, ասաց «Ելք» խմբակցության ղեկավար Նիկոլ Փաշինյանը:
«Էսօր «Ելք»խմբակցության անդամ են 2008 թվականի գործերով ամենամեծ դատավճիռներ ստացած երկու անձինք: Ոչ ոք Սասուն Միքայելյանից և ինձնից ավելի մեծ դատավճիռ չի ստացել՝ բանտարկություն: Այսինքն՝ պատճառների դեմ պայքարը մի րոպե անգամ չի դադարել»,- շեշտեց Նիկոլ Փաշինյանը:
Ըստ ընդդիմադիր գործչի՝ իշխանությանը հեռացնելը ընդհանրապես խնդիր չէ: «Կա միայն մի պայման՝ ժողովուրդը պետք է հստակ ցույց տա՝ տալիս է մեզ դա անելու մանդատ»,- շարունակեց Փաշինյանը:
Factor.am-ի հարցին՝ ինքը, որպես ընդդիմադիր գործիչ, իր մեղավորությունը տեսնո՞ւմ է, որ ժողովուրդը չի վստահում ընդդիմությանը՝ հանձին իրենց, Փաշինյանն արձագանքեց. «Աշխարհում չկա որևէ քաղաքական ուժ և քաղաքական գործիչ, որին բոլորը վստահում են: Եթե մենք պետք է խոսենք վստահության մասին, ապա պետք է հղում կատարենք պաշտոնական և ոչ պաշտոնական իրողությունների վրա: Ես Երևանի թիվ 4 ընտրատարածքում ստացել եմ 11 հազար քվե, ոմանց կարծիքով դա քիչ է, ոմանց կարծիքով՝ շատ: Իմ կարծիքով դա բավարար է արձանագրելու համար, որ այն քաղաքական գիծը, որ մենք տանում ենք, ունի որոշակի ըմբռնում հանրության շրջանում»:
Նիկոլ Փաշինյանը վստահեցրեց, որ տարբեր շրջանակների կողմից իրականացված սոցիոլոգիական հարցումները վկայում են՝ «Ելք» դաշինքը Հայաստանում ամենամեծ վստահությունն ունեցող քաղաքական ուժն է:
Շողիկ Գալստյան
