27.08.2026 | 23:19
Ծանրամարտի Հայաստանի պատանեկան հավաքականը երկրորդ տարին անընդմեջ լավագույնն է Եվրոպայի առաջնությունում
Էրդողանը հայտարարել է, թե ԵՄ պատժամիջոցները Թուրքիայի համար նշանակություն չունեն
Քաղաքականություն
09.12.2020 | 17:42
Թուրքիայի նախագահ Ռեջեփ Թայիփ Էրդողանն անդրադարձել է Բրյուսելում կայանալիք ԵՄ անդամ երկրների առաջնորդների գագաթնաժողովին և Անկարայի դեմ պատժամիջոցների սահմանման հնարավորությանը։
«Թուրքիայի դեմ պատժամիջոցների սահմանման ցանկացած որոշում մեր երկրի համար որևէ նշանակություն չի ունենա»,- հայտարարել է Էրդողանը, հաղորդում է «Անադոլու» գործակալությունը։
Նա նաև նշել է, թե Անկարան ակնկալում է Հունաստանից բարիդրացիական սկզբունքների հարգում։
«Անկարան հավատարիմ կմնա բանակցային գործընթացին, քանի դեռ Աթենքը գործում է ազնիվ, ինչպես վայել է հարևանին»,- ասել է Թուրքիայի նախագահը։
Նշենք, որ ԵՄ պետությունների ու կառավարությունների ղեկավարների գագաթնաժողովը նախանշված է դեկտեմբերի 10-11-ը, որի ընթացքում քննարկվելու է նաև Թուրքիայի դեմ պատժամիջոցներ սահմանելու հարցը։
Դեկտեմբերի 4-ին կայացած ասուլիսում ԵՄ Խորհրդի ղեկավար Շառլ Միշելն ասել էր, որ սպասվելիք գագաթնաժողովում ԵՄ առաջնորդները քննարկելու են Թուրքիայի վրա ազդելու բոլոր միջոցները՝ Միջերկրական ծովում Անկարայի գործողությունների պատճառով։
Էմմա Չոբանյան
