Հասարակություն
12.01.2018 | 15:39
Աջ ղեկով մեքենաների վարորդներն իրենց առաջարկություններով Կառավարության շենքի դիմաց էին․ «Մեզ ասում են, որ վերահաշվառման արգելքը հանվել է, մենք ասում ենք պատրաստ ենք բանակցել, ձեռք բերեցինք պայմանավորվածություն, որ պետք է մեր առաջարկությունները ներկայացնենք, բայց մինչ այդ պայմանավորվածությունը խախտեցին։ Մենք երեք նախագծեր ենք բերել, որն այժմ կներկայացնենք Կառավարությանը ու կսպասենք պատասխանի»,- նշեցին նրանք։
Կառավարության Քաղաքացիների ընդունելության և դիմումների քննարկման վարչության պետ Ալեքսանդր Ղազարյանը ակցիայի մասնակիցների հետ զրույցում վստահություն հայտնեց, որ աջ ղեկով մեքենաների վերաբերյալ որոշման նախագիծը չի հանվի, քանի որ Հայաստանում երթևեկությունն աջակողմյան է։ Լրագրողների հարցին՝ որպես տրանսպորտի, կապի և տեղեկատվական տեխնոլոգիաների նախարարության ներկայացուցիչ եք պնդում, Ղազարյանը պատասխանեց՝ ոչ, ես Կառավարության ներկայացուցիչ եմ։
Նախաձեռնության անդամները նշեցին՝ իրենց հետագա քայլերը կախված են Կառավարության որոշումից, իրենց ներկայացրած առաջարկությունների վերաբերյալ։
«Աջ ղեկ» նախաձեռնության համակարգող Գևորգ Աճեմյանն էլ մեզ հետ զրույցում ասաց, որ այդ ակցիային իրենց նախաձեռնությունից մասնակիցներ չեն եղել․ «Իրենք ուղղակի մարդիկ են, ովքեր մասնակցել են մեր բողոքի ակցիաներին։ Երբ որոշումն արդեն ընդունվել է, էլ ինչ առաջարկությունների մասին է խոսքը»։
Հիշեցնենք, որ նախօրեին Կառավարությունը հաստատել է Տրանսպորտի, կապի և տեղեկատվական տեխնոլոգիաների նախարարության ներկայացրած որոշման նախագիծը, որով ապրիլի 1–ից սահմանափակվելու է աջ ղեկով մեքենաների ներկրումը և գրանցումը:
