14.12.2025 | 14:02
Մառախուղ, քամու ուժգնացում․ օդի ջերմաստիճանը կնվազի
ԵՐԵՎԱՆԻ ԺԱՄԱՆԱԿՈՎ. Վազգեն Մանուկյանը չի կարող լինել անցումային կառավարության ղեկավար․ Անահիտ Թարխանյան․ ՏԵՍԱՆՅՈՒԹ
Քաղաքականություն
08.12.2020 | 18:03
«Ակնհայտ է, որ կապիտուլյացիա ստորագրած վարչապետը չի կարող կառավարել երկիրը, բայց հարց է ծագում՝ երբ պետք է նա հեռանա՝ վա՞ղը, մյուս տարի՞, թե՞ մեկ տարի հետո։ Ինձ համար ցանկալի կլինի, որ մեկ տարի անց նա դեռ կառավարի, որովհետև 17 կուսակցություններից 3-ը և մնացած 14-ը, որոնք մարդ-նախաձեռնություն են, ներկայացնում են նախկին նախագահ Սերժ Սարգսյանին։ Ես չեմ միանա նրանց։ Հանրությունը շատ մեծ ճանապարհ անցավ, որ Սերժ Սարգսյանը հրաժարական տա, և այսօր նրան հետ հրավիրելն ինձ համար անընդունելի է»,-Factor.am-ի հետ զրույցում նման տեսակետ է հայտնում ճարտարապետ Անահիտ Թարխանյանը։
Նրա համոզմամբ՝ Փաշինյանը պետք է հեռանա հանգիստ ձևով, սահմանադրական ճանապարհով․ «Երկու ընդդիմադիր ուժերը՝ «Լուսավոր Հայաստանը» և «Բարգավաճ Հայաստանը», պետք է վայր դնեն մանդատները և նոր ընտրություններ կազմակերպվեն։ Եթե հիմա ընտրելու լինենք 17 կուսակցությունների ու Փաշինյանի միջև, ըստ իս, Փաշինյանը պետք է մնա։ Իսկ եթե նոր իրավիճակ ենք ուզում, պետք է չէ մարդկանց հանել փողոցներ, դրան պետք է հասնել օրինական ճանապարհով»։
Անահիտ Թարխանյանը կարծիք է հայտնում նաև 17 ընդդիմադիր կուսակցությունների թեկնածուի մասին։
«Վազգեն Մանուկյանը չի կարող լինել անցումային կառավարության ղեկավար։ Նա տարիներ շարունակ ղեկավարել է Հանրային խորհուրդը, որը ֆինանսավորվել է Սերժ Սարգսյանի կողմից։ Մենք չտեսանք այդ խորհրդի նպատակը, մտավորականների հնարավորություններն ու պոտենցիալը սառեցվեց»,- ասում է նա։
Անդրադառնալով Ամենայն Հայոց կաթողիկոս Գարեգին Բ-ի հորդորին, որ ՀՀ վարչապետ Նիկոլ Փաշինյանը վայր դնի լիազորությունները, մեր զրուցակիցը շեշտում է․ «Ես կուզենայի կաթողիկոսից լսել՝ ում է նա առաջարկում Փաշինյանի փոխարեն՝ Դուք սատարում եք 17 կուսակցությունների՞ն, Վազգեն Մանուկյանի՞ն։ Պատգամը կա, լուծումը՝ չկա»։
Հարցազրույցն ամբողջությամբ՝ տեսանյութում։
Աննա Բաբաջանյան
