09.02.2026 | 14:44
«Ռեալը» մեծ աշխատավարձ է վճարում Մբապեի մորը
Պետք է շտապ կազմակերպել գերիների ու զոհվածների մարմինների վերադարձի հարցը․ Փաշինյան. ՏԵՍԱՆՅՈՒԹ
Քաղաքականություն
02.12.2020 | 14:09
ՀՀ վարչապետ Նիկոլ Փաշինյանը մասնակցել է ՀԱՊԿ Հավաքական անվտանգության խորհրդի նիստին, որի ժամանակ ունեցած ելույթում կարևորել է ռազմագերիների փոխանակման հարցը։
«Վերջին երկու ամիսը հայ ժողովրդի համար դարձել է ագրեսիայի դեմ պայքարի ժամանակաշրջան։ Թուրքիայի, Մերձավոր Արևելքից վարձու ահաբեկիչների աջակցությամբ Ադրբեջանը պատերազմ է սանձազերծել ընդդեմ հայ ժողովրդի։ Ինչպես ձեզ հայտնի է՝ Ռուսաստանի միջնորդական ջանքերի շնորհիվ հաջողվել է կանգնեցնել ռազմական գործողություններն ու պայմանավորվել իրավիճակի ապաէսկալացմանն ուղղված քայլերի շուրջ։ Արդեն 3 շաբաթից ավելի է, ինչ ավարտվել են ռազմական գործողությունները, հակամարտության գոտում տեղակայված են ռուս խաղաղապահներ, սակայն մինչ օրս մենք ունենք մի շարք անհետաձգելի խնդիրներ։ Նախևառաջ, դա ռազմագերիների, պատանդների ու զոհվածների աճյունների փոխանակման և անհետ կորածների ճակատագրի հարցը լուծելու խնդիրն է։ Սրանք անհետաձգելի հարցեր են։ Հայկական կողմը պատրաստ է ինտենսիվացնել գործողությունները այս հարցում։ Ընդ որում, անհրաժեշտ է բացառել բռնության կիրառումը ռազմագերիների ու այլ պատանդների նկատմամբ, ինչպես նաև նրանց ինքնասիրության նվաստացումը։ Երկրորդը՝ պայմանների ստեղծումն է իրենց տուն արցախցիների վերադարձի համար, Լեռնային Ղարաբաղում նորմալ կյանքի վերականգնումն է․ մարդիկ պետք է վստահ լինեն, որ անվտանգությունն ապահովված է և կարող են շարունակել ապրել իրենց հողում։ Մի քանի տասնյակ հազար արցախցիներ արդեն վերադարձել են իրենց տներ։ Մենք բոլոր ջանքերն ենք թափում՝ մեր հայրենակիցներին աջակցելու ու օգնելու համար։ Բացի այդ, անհրաժեշտ է քայլեր ձեռնարկել մշակութային ու կրոնական հուշարձանների պահպանման հարցում, որոնք գտնվում են Ադրբեջանի զինված ուժերի կողմից վերահսկվող տարածքներում»,- հայտարարել է Նիկոլ Փաշինյանը՝ նշելով, որ կարևորվում է տրանսպորտային հաղորդակցության անվտանգությունը՝ բացառելով ցանկացած տիպի սադրանքները։
Նիկոլ Փաշինյանը շեշտել է, որ ՌԴ նախագահ Վլադիմիր Պուտինի հետ ինտենսիվ շփման մեջ է վերոնշյալ խնդիրների լուծման հարցում։
ՌԴ նախագահ Վլադիմիր Պուտինն իր հերթին նշել է, որ իսկապես հայ ժողովուրդն ապրում է իր պատմության ընթացքում ծանր շրջան։
«Հայաստանի ղեկավարությունը, ՀՀ վարչապետը ստիպված են եղել շատ բարդ, բայց հայ ժողովրդի համար անհրաժեշտ որոշումներ կայացնել։ Այդ որոշումները, իհարկե, ցավոտ են, սակայն ևս մեկ անգամ ընդգծեմ, որ անհրաժեշտ որոշումներ էին ու պահանջում էին վարչապետի մեծ անձնական քաջություն։ Սա ակնհայտ է։ Այստեղ գտնվող յուրաքանչյուր ոք գիտակցում է այդ պատասխանատվության աստիճանը։ Նա այդ պատասխանատվությունը վերցրեց իր վրա»,- հայտարարել է Պուտինը։
Տաթև Ֆռանգյան
