Վարչապետը փակ հանդիպում է ունեցել ՀԽ կազմի հետ. բարձրաձայնվել է նաև Փաշինյանի հրաժարականի հարցը

Factor.am-ի տեղեկություններով՝ երեկ ՀՀ վարչապետ Նիկոլ Փաշինյանի և Հանրային խորհրդի անդամների հանդիպում է տեղի ունեցել: Այս տեղեկությունը Factor.am-ի հետ զրույցում հաստատեցին Հանրային խորհրդի երկու անդամներ՝ Դանիել Իոաննիսյանը և Գաբրիել Ջեմբերջյանը:

Հանդիպման ժամանակ խորհրդի մի քանի անդամներ բարձրաձայնել են Նիկոլ Փաշինյանի հրաժարականի հարցը: Գաբրիել Ջեմբերջյանը մեզ հետ զրույցում հաստատելով այս տեղեկությունը՝ ասաց. «Քննարկել ենք ընդհանուր երկրի վիճակը: Քննարկվեց նաև վարչապետի հրաժարականի հարցը: Նիկոլ Փաշինյանն ասաց՝ ես կարող եմ շտկել այս երկիրը: Երեք ժամ է տևել նիստը, բայց ես մինչև վերջ չմնացի: Բոլոր անդամները ներկա չեն եղել, միայն 14 անդամ էր ներկա: Ես սովորություն չունեմ, որ կառավարությունից հաղորդագրություն չեն տվել ես խոսեմ»։

Հանրային խորհրդի անդամ Դանիել Իոաննիսյանն էլ մեզ հետ զրույցում փակ հանդիպումից քիչ մանրամասներ փոխանցեց:

«Փակ հանդիպում էր, հիմա կոռեկտ չէ՝ ասեմ, թե ով ինչ հարց է բարձրացրել և ինչ պատասխան է ստացել: Միայն ասեմ, որ ես բարձրացրել եմ պատերազմի ժամանակ հանրային կոմունիկացիայի, Կապանի սահմանամերձ հատվածների անվտանգության հետ կապված հարցեր և այլն»,- ասաց Իոաննիսյանը:

Անդրադառնալով Նիկոլ Փաշինյանի հրաժարականի հարցի բարձրացմանը՝ Դանիել Իոաննիսյանն ասաց. «Ես նման հարց չեմ բարձրացրել: Եթե պարոն Ջեմբերջյանն ասում է, ուրեմն մի բան գիտի: Կոռեկտ չի, որ փակ հանդիպումից հրապարակում անեմ»:

Հանրային խորհրդի նախագահ Ստյոպա Սաֆարյանը ևս չհերքեց, որ նիստի ժամանակ հարց է հնչել Փաշինյանի հրաժարականի մասին, սակայն մանրամասներ այս հարցի հետ կապված չհայտնեց՝ նույնպես նշելով, որ փակ հանդիպում է եղել:

«Քանի որ պայմանավորվել ենք, որ հանդիպումն առանց մամուլի է, ես ինձ թույլ չեմ տա մանրամասներ ասել: Պետք է ասեմ, որ շատ հարցեր ենք քննարկել՝ կառավարության ճանապարհային քարտեզի իրականացումից մինչև Արցախի սոցիալական հարցեր: Եղել է բավականին հագեցած քննարկում՝ կառուցողական դաշտում»,- ասաց նա:

Նարեկ Կիրակոսյան