Իրանցի գիտնականի սպանությունը մեր թշնամու անզորության մասին է վկայում. Հասան Ռոհանի

«Անկասկած, այս ահաբեկչությունը վկայում է Իրանի թշնամիների անզորության մասին, երկրի գիտական ​​զարգացման ու կարողությունների և տարածաշրջանում  քաղաքական  ու այլ ասպարեզներում նրանց հերթական պարտությունների մասին»,- այս մասին շաբաթ օրը հայտարարել է Իրանի նախագահ Հասան Ռոհանին՝ անդրադառնալով  հայտնի միջուկային ֆիզիկոս Մոհսեն Ֆահրիզադեի սպանությանը. փոխանցում է ԻՌՆԱ գործակալությունը:

«Մեր թշնամիները պետք է իմանան, որ Մոհսեն Ֆահրիզադեի սպանությունը ոչ միայն չի խաթարի Իրանի երիտասարդության և գիտնականների կամքը ՝ շարունակելու գիտական զարգացման ուղիները, այլև նրանց կամքն ավելի վճռական կլինի, – նշել է Իրանի նախագահը:

Նրա խոսքով ՝ Մոհսեն Ֆահրիզադեի սպանությունը ցույց է տալիս Իրանի թշնամիների ատելության խորությունն ու չարությունը, սակայն նրա սպանությունը չի դանդաղեցնի երկրի գիտական ձեռքբերումները:

Հիշեցնենք, որ Իրանում ահաբեկչության հետևանքով սպանվել է երկրի Պաշտպանության նախարարության հետազոտությունների և նորարարությունների կազմակերպության ղեկավար, միջուկային ֆիզիկոս Մոհսեն Ֆահրիզադեն։

Դեպքին թվիթերյան գրառմամբ անդրադարձել է Իրանի ԱԳ նախարար Մոհամմադ Ջավադ Զարիֆը՝ Ֆահրիզադեի սպանության համար մեղադրելով Իսրայելին։ «Այդ ստոր արարքը, որտեղ կան Իսրայելի դերի լուրջ վկայություններ, ցույց է տալիս հանցագործների հուսահատ քայլը՝ պատերազմ հրահրելու համար»,- գրել է Զարիֆը։

Նա նաև կոչ է արել միջազգային հանրությանը, Եվրամիությանը՝ դադարեցնել երկակի ստանդարտների քաղաքականությունը և դատապարտել պետական ահաբեկչական գործողությունը։