19.01.2026 | 16:17
Դավիթ Համբարձումյանը հնարավորություն ունեցել է չվերադառնալու, բայց վերադարձել է՝ գիտակցումով, որ գնալու է բանտ. պաշտպան
Արցախը պաշտպանելիս Գյումրու արհեստագործական ուսումնարանի 3 ուսանող է զոհվել․ ԼՈՒՍԱՆԿԱՐՆԵՐ
Հասարակություն
26.11.2020 | 19:04
Արցախյան այս պատերազմում հայրենիքի սահմանները պաշտպանելիս նահատակվել են Գյումրու թիվ 4 արհեստագործական պետական ուսումնարանի երեք նախկին ուսանողներ։ Factor.am-ի հետ զրույցում ուսումնարանի տնօրեն Քնարիկ Ահարոնյանն ասաց՝ սաների կորուստը մեծ ցավ է բոլորի համար։
Թուրք-ադրբեջանական ահաբեկչական գործողությունների դեմ մարտնչելիս զոհված 19-ամյա Արթուր Սուրենի Աթոյանը սովորել ուսումնարանի «Ռադիոէլեկտրոնային միջոցների տեխնիկական սպասարկում և նորոգում» բաժնում։ Տնօրենի խոսքով՝ Արթուրը պարտաճանաչ և ակտիվ ուսանող էր, լավ մասնագիտական գիտելիքներ և կարողություններ ուներ:
«Սիրով մասնակցում էր ուսումնաճանաչողական բաց դասերին և էքսկուրսիաներին, ներուսումնարանային և քաղաքային միջոցառումներին, առավել ակտիվ՝ ռազմահայրենասիրական և սպորտային միջոցառումներին: Նա վայելում է մանկավարժների, ընկերների սերն ու հարգանքը»,- հիշում է Քնարիկ Ահարոնյանը։
Արթուրը 2019 թվականին էր զորակոչվել բանակ: Նախ ծառայել է Ասկերանում, հետո տեղափոխվել է Ջաբրայիլ, որտեղ էլ զոհվել է: Ահարոնյանի խոսքով՝ Արթուրը հայր չուներ, ապրում էր մոր և քրոջ հետ։
Զոհված մյուս ուսանողը 1997 թվականին ծնված Կարեն Խաչիկի Սարգսյանն է։ Ուսումնարանի տնօրենը պատմեց՝ հայր չուներ, բնակվում էր մոր, երկու եղբայրների ու տատիկի հետ: Ավարտել է արհեստագործական ուսումնարանի «Զարդակիրառական արվեստ» բաժինը, իսկ Հայոց բանակում ծառայել է 2015-17 թվականներին։
«Արդեն կայացած անձ էր։ Երբ 2020 թվականի սեպտեմբերի 27-ին սանձազերծվեց պատերազմը, նա առանց երկմտելու ստանձնեց հայրենիքի պաշտպանության վեհ գործը։ Մարտնչեց Մարտունիում և զոհվեց։ Ցավոք, շատ երազանքներ մնացին անկատար»,- ասաց Քնարիկ Ահարոնյանը։
Ուսումնարանի շենքում գործում է նաև ԿԳՄՍՆ «Ընտանիք» մանկապատանեկան ստեղծագործական կենտրոնը, որտեղ էլ սովորել է արցախյան պատերազմում զոհված մյուս երիտասարդը՝ Արման Յուրիկի Գրիգորյանը։ 2019-ին ընդունվել էր Շիրակի պետական համալսարան, 1-ին կիսամյակի ավարտին զորակոչվել։
«Արմանը նախաձեռնող, նպատակասլաց մարդ էր, վայելում էր շրջապատի, ընկերների սերն ու հարգանքը: Արմանի ընտանիքը բաղկացած է 7 անձից, որից 5-ը՝ անչափահաս, իսկ ծնողները չեն աշխատում»,- պատմեց Քնարիկ Ահարոնյանը։
Նրա խոսքով՝ զոհված զինծառայողների ընտանիքներն աջակցության կարիք ունեն։ Ասաց՝ ինչով կարողացել են, օգնել են, բայց այս դեպքում կարևոր է պետական աջակցությունը։
Ուսումնարանի տնօրենը նշեց նաև, որ իրենց 4 ուսանող էլ վիրավորվել է ռազմական գործողությունների ժամանակ։
«Երկուսը հետ են վերադարձել, գնացել հերթափոխի․ մեկի ոտքը և ուսն է վիրավոր, մյուսի՝ ոտքը, վիրահատել են մի քանի անգամ, բայց նորից պետք է անեն։ Մեկի էլ թևն է կտրված, ասել են՝ հավաքելու են, տեսնենք՝ ինչ կլինի»,- ասաց Քնարիկ Ահարոնյանը։
Էմմա Չոբանյան
