14.10.2026 | 21:04
Սահմանադրական դատարանի դատավոր չընտրվեց
Քննարկվում է Վիգեն Սարգսյանի պաշտոնանկության հարցը. ՀԺ
10.01.2018 | 09:35
«Հայկական ժամանակ» թերթը գրում է.
«Հանրապետական կուսակցության շրջանակներում քննարկվում է ՀՀ պաշտպանության նախարար Վիգեն Սարգսյանի պաշտոնանկության հարցը:
Մեր աղբյուրները հայտնում են, որ Սերժ Սարգսյանը նեղ շրջանակում դժգոհություն է հայտնել Վիգեն Սարգսյանից և նեղսրտել, թե Վիգենը չկարողացավ արդարացնել իրեն պաշտպանության նախարարի պոստում:
Իրազեկ աղբյուրներից «Հայկական ժամանակ»-ին հայտնի դարձավ, որ իշխանության վերին օղակներում քննարկվում է ապրիլի 9-ից հետո ՀՀ պաշտպանության գործող նախարար Վիգեն Սարգսյանին արտաքին գործերի նախարարություն տեղափոխելու հարցը:
Ըստ նույն աղբյուրների՝ Վիգեն Սարգսյանը նոր կառավարությունում կարող է դառնալ արտգործնախարար, իսկ պաշտպանության նախարարի պոստում քննարկվում է Արտակ Զաքարյանին նշանակելու հարցը:
Հիշեցնենք՝ Արտակ Զաքարյանն այժմ ՀՀ պաշտպանության նախարարի առաջին տեղակալն է: Վերջինս ՊՆ տեղափոխվեց Ազգային ժողովից: Նախորդ գումարման խորհրդարանում նա զբաղեցնում էր ԱԺ արտաքին հարաբերությունների հանձնաժողովի նախագահի պաշտոնը:
«Հայկական ժամանակի»-ի աղբյուրները հայտնում են նաև, որ փոփոխությունների այս համատեքստում հնարավոր է, որ Վիգեն Սարգսյանին ԱԳՆ տեղափոխելուց հետո ԱԳ գործող նախարար Էդվարդ Նալբանդյանն իշխող ՀՀԿ-ի կողմից առաջադրվի հանրապետության նախագահի պոստում:
Հիշեցնենք, ապրիլի 9-ից հետո ՀՀ նախագահը, որն ընտրվելու է Ազգային ժողովի կողմից, ունենալու է խիստ սահմանափակ լիազորություններ, երկրի իրական ղեկավարը լինելու է վարչապետը»:
Առավել մանրամասն՝ թերթի այսօրվա համարում:
