Դոլարի վերելքն ու դրամի արժեզրկումը շարունակվում է

Հայկական դրամի արժեզրկումն ու դոլարի վերելքը շարունակում է նոր տեմպեր հավաքել: Այսօր` նոյեմբերի 24-ին արդեն դոլարը գնվում է շուրջ 508 դրամով, վաճառվում` շուրջ 520 դրամով` ըստ Rate.am կայքի:

Այսպիսով` նոյեմբերի 22-ի համեմատ դոլարի առքի տատանումը կազմել է +3,83 դրամ, վաճառքը` +4,83 դրամ:

Դոլարի թանկացումն ու դրամի արժեզրկումը սկսվեց Լեռնային Ղարաբաղում պատերազմական գործողություններին ու Հայաստանում ռազմական դրություն հայտարարելուն զուգահեռ: Պատերազմի հետևանքով ստեղծված անկայուն իրավիճակը հանգեցրեց դոլարի նկատմամբ պահանջարկի ավելացման ու դրամի արժեզրկման:

Եթե սեպտեմբերի 25-ին դոլարն արժեր շուրջ 485 դրամ, ապա սեպտեմբերի 29-ին այն հասավ 488 դրամի: Նոյեմբերի 10-ի դրությամբ դոլարի արժեքը 494 դրամ էր, որից հետո դոլարի վերելքն էլ ավելի մեծ թափ առավ՝ հասնելով 522 դրամի:

Նշենք, որ այսօր Կենտրոնական բանկը հայտարարություն տարածեց, որից կարելի է ենթադրել, որ Կենտրոնական դրամատանը ևս մտահոգել է դրամի շարունակական արժեզրկումն ու ԿԲ-ն պատրաստվում է միջամտել։

«ՀՀ ֆինանսական շուկաների բնականոն գործունեության ապահովման նպատակով ՀՀ կենտրոնական բանկը ՀՀ արտարժութային շուկայում կիրականացնի գործառնություններ։ ՀՀ կենտրոնական բանկը շարունակում է իրականացնել ֆինանսական շուկաների մշտադիտարկում և անհրաժեշտության դեպքում կկիրառի իր գործիքակազմում առկա բոլոր գործիքները՝ երաշխավորելով գների և ֆինանսական կայունությունը»,- վստահեցնում է ԿԲ-ն։

Այնուամենայնիվ, կենտրոնական դրամատունը չի նշում, թե ինչ գործիքակազմ են պատրաստվում կիրառել։