08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Ինչպե՞ս ենք վիրավորներին վերադարձնելու լիիրավ կյանքի․ Թորոսյանի խոսքով՝ մեծ վերականգնողական կենտրոն է անհրաժեշտ. ՏԵՍԱՆՅՈՒԹ
Հասարակություն
18.11.2020 | 17:37
«Ոլորտում անելիքները շատ են, երեք հիմնական ուղղությամբ լավ պետք է աշխատել, որպեսզի վիրավոր զինծառայողներին հնարավորինս վերադարձնենք լիիրավ կյանքի: Առաջինը՝ եղած հզորությունների լավագույնս օգտագործումն է, ինչի մի մասն այնքան էլ լավ վիճակում չէ և կարիք ունի արդիականացման՝ սկսած մասնագետների վերապատրաստումից և վերջացրած շենքային պայմաններով»,-ԱԺ-կառավարություն հարցուպատասխանի ժամանակ այսօր ասաց ՀՀ առողջապահության նախարար Արսեն Թորոսյանը՝ պատասխանելով հարցին, թե մարտական գործողությունների հետևանքով վիրավորված զինծառայողների վերականգնողական բուժման ուղղությամբ ինչ աշխատանք է նախատեսված:
«Երկրորդ, մեր հաշվարկներով՝ նոր հզորություններ են պետք, զրոյից ստեղծվող, մոտ 250 մահճակալանոց մեծ վերականգնողական կենտրոնի մասին է խոսքը: Երրորդն էլ հզորությունների մշտական աջակցությունն է՝ պետպատվերով ծառայություններ գնելու տեսքով: Մեր հաշվարկներով՝ շարունակական աջակցությունը պետբյուջեի վրա հավելյալ 2-2,5 միլիարդ դրամ կարող է արժենալ: Հաշվարկները վերջնական չեն և չեն ներառված բյուջեի նախագծում: Վերջնական լինելու դեպքում փոփոխությունները կնախաձեռնվեն: Դա անհրաժեշտ է՝ տարեկան միջինը երկու ստացիոնար վերականգնողական կուրս անցնելու համար»: Նախարարի խոսքով. «Միջազգային աջակցության տեսանկյունից կարծում ենք, որ նոր կենտրոնի ստեղծման մեջ մեծ ներդրում կարող են ունենալ սփյուռքի հումանիտար և բժշկական կազմակերպությունները: Այդ նպատակով կարճ նկարագիր ունենք, որը կշրջանառենք դիվանագիտական ներկայացուցիչների և սփյուռքի գործերի գլխավոր հանձնակատարի միջոցով, որպեսզի հնարավորինս շուտ սկսենք դրա գործարկումը: Մինչ այդ հրատապ տեղավորելուն ուղղված ջանքեր են գործադրվում»:
Մանրամասները՝ տեսանյութում:
