10.06.2026 | 15:52
Լավրովը հայտարարել է, թե ՀԱՊԿ-ը կդիտարկի ՀՀ-ի դեմ համապատասխան միջոցների հարցը՝ անդամավճարների չվճարման պատճառով
ՀԱՊԿ-ում մեկնաբանել են Ադրբեջանի կողմից ռուսական ուղղաթիռի խոցման միջադեպը
Քաղաքականություն
09.11.2020 | 22:51
Հավաքական անվտանգության պայմանագրի կազմակերպության (ՀԱՊԿ) մամուլի քարտուղար Վլադիմիր Զայնետդինովն «ափսոսանք է հայտնել, որ Ղարաբաղում հակամարտության սրացումը հանգեցրել է ցավալի հետևանքների»։ Այս մասին նա ասել է ՌԻԱ Նովոստիին՝ մեկնաբանելով ադրբեջանական զինուժի կողմից ռուսական Մի-24 ուղղաթիռի խոցումը։
«Լուրջ մտահոգություն ենք հայտնում տեղի ունեցած միջադեպի կապակցությամբ, ցավակցում ենք անձնակազմի զոհված անդամների հարազատներին և մերձավորներին։ Կսպասենք հետաքննության արդյունքներին՝ որտեղից է արձակվել կրակը»,- ասել է Զայնետդինովը։
Նա հիշեցրել է, որ ՀԱՊԿ-ը բազմիցս հակամարտող կողմերին կրակի դադարեցման կոչ է արել։
Հիշեցնենք, որ այսօր Հայաստանում ռուսական Մի-24 ուղղաթիռը կործանվել է Երասխի մոտակայքում։ ՌԴ ՊՆ հաղորդել է, որ դեպքը տեղի է ունեցել Մոսկվայի ժամանակով 17:30-ի սահմաններում (Երևանի ժամանակով՝ 18:30), երբ ուղղաթիռն ուղեկցում էր ռուսական 102-րդ ռազմաբազայի ավտոշարասյունը Ադրբեջանի հետ սահմանից ոչ հեռու։
Ուղղաթիռի անձնակազմի երկու անդամ զոհվել է, մեկ զինվորական դուրս է բերվել, նա միջին ծանրության վնասվածքներ է ստացել։ Ռուսական 102-րդ ռազմաբազայի հրամանատարությունը հետաքննություն է անցկացնում։ Հայկական կողմը հետաքննությանն աջակցելու պատրաստակամություն է հայտնել։
Ավելի ուշ ադրբեջանական կողմը խոստովանել է, որ խոցել է ռուսական ուղղաթիռն ու ներողություն խնդրել Ռուսաստանից։
