30.06.2026 | 22:20
Էրդողանն արձագանքել է Իսրայելի կառավարության՝ Հայոց ցեղասպանության ճանաչման որոշմանը
Վրաստանի ընդդիմությունը մինչև 20:00-ն ժամանակ է տվել իշխանությանը. ցույց Թբիլիսիում
Քաղաքականություն
08.11.2020 | 20:37
Թբիլիսիում՝ Վրաստանի խորհրդարանի հարակից տարածքում, Վրաստանի ընդդիմադիր կուսակցությունների ու քաղաքացիական հատվածի ներկայացուցիչների մեծամասշտաբ ցույցն ընթացքի մեջ է:
Aliq.ge-ի փոխանցմամբ՝ ընդդիմադիր կուսակցությունները Վրաստանի իշխանությանը մինչև ժամը 20:00-ն ժամանակ են տվել՝ ԿԸՀ-ի նախագահ Թամար Ժվանիային պաշտոնանկ անելու ու նոր ընտրական հանձաժողովի կազմ ձևավորելու համար: Ընդդիմադիրները խոստացել են՝ սրանից հետո միայն Իվանիշվիլիի հետ կքննարկեն նոր խորհրդարանական ընտրություններ նշանակելու հարցը: Սա, ի դեպ, երկրորդ պահանջն է: Երրորդ պահանջը բոլոր քաղբանտարկյալներին ազատ արձակելն է:
Իշխանության ներկայացուցիչներից «Վրացական երազանք» կուսակցության գլխավոր քարտուղար Մամուկա Մդինարաձեն ցույցի ընթացքը մեկնաբանել է որպես անլրջություն ու հայտարարել, որ ոչ ոք չի պատրաստվում այս պահանջներն իրականացնել:
Ցուցարարները վանկարկում են. «Իվանիշվիլի գնա, դու ուզուրպատոր ես, իսկ ուզուրպատորը պետք է գնա»։
Ցույցն անցկացվում է կորոնավիրուսի տարածումը կանխարգելելու նպատակով սահմանված սահմանափակումների ֆոնին: Այսպես, ելնելով բաց տարածքներում դիմակ կրելու հետ կապված վերջերս ուժի մեջ մտած կարգավորումից, ցուցարարները դիմակներով են: Սոցիալական հեռավորություն, սակայն, չի ստացվում պահպանել:
Հիշեցնենք՝ հոկտեմբերի 31-ին Վրաստանում կայացան խորհրդարանական ընտրություններ, որոնց արդյունքում պետք է ձևավորվի 10-րդ գոմարման խորհրդարանը: Ընտրությունների 1 տոկոսանոց շեմը հաղթահարած 9 կուսակցություններից 8-ը հրաժարվել են իրենց մանդատներից ու չեն ճանաչում ընտրության արդյունքները: Նրանք ընտրությունների հաջորդ օրվանից ի վեր մշտական բողոքի ցույցեր են անցկացնում: Այսօր՝ նոյեմբերի 8-ին, խոստացել էին ամենամասշտաբային ցույցը կազմակերպել:
