29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Պատգամավորներն առաջարկում են զինվորի հիմնադրամի վճարը ավելացնել ըստ աշխատավարձի՝ 1000-ից 10 հազար դրամ. ՏԵՍԱՆՅՈՒԹ
Քաղաքականություն
06.11.2020 | 21:04
Ազգային ժողովի խմբակցությունները, ընդհանուր առմամբ, դեմ չեն Պաշտպանության նախարարության այն առաջարկին, որ «Զինծառայողների ապահովագրության հիմնադրամին» վճարվող ամսական պարտադիր վճարները 1000 դրամից դառնան 3000 դրամ: Նման նախագիծ երեկվանից հանրային քննարկման է դրվել «Իրավական ակտերի նախագծերի հրապարակման միասնական» կայքում։
Հիմնավորման մեջ նշվում է, որ օրենսդրական առաջարկը պայմանավորված է 2020 թվականի սեպտեմբերի 27-ին Ադրբեջանի Հանրապետության կողմից Արցախի Հանրապետության դեմ հարձակում կատարելու հանգամանքով։
Հարձակման հետևանքով՝ «Զինծառայողների ապահովագրության հիմնադրամի» շահառուների թիվն աճել է։ «Իմ քայլը» խմբակցությունից Թագուհի Թովմասյանը, որը կողմ է հիմնադրամին պարտադիր վճարվող գումարի շեմը բարձրացնելուն, Factor TV-ի հետ զրույցում նշեց, որ պատրաստվում էր նախագիծ շրջանառել, որի համաձայն, վճարումների չափը կախված կլինի քաղաքացու աշխատավարձի չափից:
«Իմ քայլից» մեկ այլ պատգամավոր՝ տնտեսական հարցերի մշտական հանձնաժողովի փոխնախագահ Արտակ Մանուկյանն էլ Factor TV-ի հետ զրույցում ասաց, որ ապահովության մոդելն այլ պահանջներ է ենթադրում, ուստի բոլորը պետք է հավասարաչափ վճարում կատարեն՝ անկախ աշխատավարձի չափից: Այնուհանդերձ, իմքայլական Թագուհի Թովմասյանը նշում է, թեև անկախ աշխատավարձի չափից բոլորն էլ մեծ ցանկություն ունեն զինհաշմանդամներին կամ մարտի դաշտում զոհվածի ընտանիքներին օգնել, պետությունը պետք է մեխանիզմներ առաջարկի, որ նվազագույն աշխատավարձ ստացողը սոցիալական խնդիրների չբախվի:
Թովմասյանն ասում է «Իմ քայլում» իր հետ համակարծիք այլ պատգամավորներ էլ կան: Նախագիծը հենց մտնի ԱԺ՝ նրանք իրենց առաջարկությունները կներկայացնեն կառավարությանը:
Ընդդիմադիր ԲՀԿ խմբակցությունում ևս դեմ չեն զինվորի ընտանիքին տրվող օգնության ծավալները մեծացնելուն: Սակայն Նաիրա Զոհրաբյանը խնդիր է տեսնում։ Զոհրաբյանն ասում է, որ ԲՀԿ-ն օրենքի նախագիծ է շրջանառության մեջ դրել, որ 100-300 հազար դրամ ստացողը վճարի 1000 դրամ, իսկ, օրինակ, մեկ մլն դրամ ստացողը 10 հազար դրամ: Այնուհանդերձ՝ պատգամավորը նշում է՝ եթե իշխող մեծամասնությունը դեմ լինի իրենց նախագծին, միևնույն է, ՊՆ-ի նախագծին ԲՀԿ-ն կողմ կքվեարկի, քանի որ այս օգնությունը զոհերի ընտանիքներին անհրաժեշտություն է:
Իսկ ահա «Իմ քայլից» Արտակ Մանուկյանը ընդդիմադիր գործընկերներին առաջարկում է անարդարությունը վերականգնելու համար կամավոր հիմունքներով ավել գումարներ վճարել զինծառայողների հիմնադրամին:
ԱԺ երրորդ խմբակցությունը՝ «Լուսավոր Հայաստանը», թեմայի վերաբերյալ մեկնաբանություն չունի: Խմբակցության պատգամավոր Անի Սամսոնյանը փոխանցեց, որ հարցը դեռ չեն քննարկել:
Նարեկ Կիրակոսյան
