18.04.2026 | 20:30
TikTok-յան քաղաքական պատերազմներ․ ինչպես են ԱԲ-ով կեղծում իրականությունը․ ՏԵՍԱՆՅՈւԹ
Ոչ մի ուժ չի կարող փոխել տարածաշրջանի աշխարհագրությունը․ իրանցի գեներալը՝ ԼՂ հակամարտության մասին
Քաղաքականություն
06.11.2020 | 18:48
Իրանի ցամաքային զորքերի հրամանատար, բրիգադային գեներալ Կիումարս Հեյդարին (Kiumars Heidari) հայտարարել է, որ Իրանի Իսլմական Հանրապետության զինված ուժերն ամեն ինչ կանեն, որպեսզի ապահովեն երկրի սահմանամերձ շրջանների անվտանգությունն ու չեն հանդուրժի միջազգային իրավունքի խախտում։ Անդրադառնալով Լեռնային Ղարաբաղում զինված հակամարտությանը՝ իրանցի զինվորականն ընդգծել է, որ Թեհրանը կոչ է անում Հայաստանին ու Ադրբեջանին լուծել իրենց խնդիրները քաղաքական կարգավորման ճանապարհով, հայտնում է Mehr գործակալությունը։
«Տարածաշրջանում կայունության պահպանումը մեր կարմիր գիծն է, և ոչ մի ուժ չի կարող փոխել տարածաշրջանի աշխարհագրությունը, մենք դա չենք հանդուրժի», – նշել է Իրանի Զինված ուժերի հրամանատարը ՝ չմանրամասնելով, թե ինչ նկատի ունի «տարածաշրջանի աշխարհագրությունը» փոխելու անթույլատրելիություն ասելով:
Վերջինս նաև հայտնել է, որ Իրանի սահմանամերձ շրջաններում տեղակայված են բանակի և Իսլամական Հանրապետության պահապանների կորպուսի լրացուցիչ ցամաքային ստորաբաժանումներ, որոնք կանեն հնարավոր ամեն բան տարածաշրջանում անվտանգության և խաղաղության պահպանման համար»:
Հեյդարին նաև հավաստիացրել է, որ ներկայում երկրի հյուսիսարևմտյան սահմաններին ոչ մի վտանգ չի սպառնում, և Զինված ուժերը պատրաստ են պաշտպանել Իրանի ժողովրդին:
Տաթև Ֆռանգյան
