ԵՐԵՎԱՆԻ ԺԱՄԱՆԱԿՈՎ. Աշխարհն իրեն տվել է փողին ու հաճույքներին և ամուլ է դարձել․ Եղիշե Պետրոսյան. ՏԵՍԱՆՅՈՒԹ

«Ցավոք, մենք, ունենալով գիշատիչ թշնամի, անկախության տարիները չօգտագործեցինք՝ այսօրվա ոտնձգությունների առջև ամուր կանգնելու համար։ Երբ բազում մտավորականներ անընդհատ այս մասին էին զգուշացնում, մենք չընկալեցինք դա, բայց ժողովուրդն այսօր բավական հասունացել է, ադեկվատ մտածողները վստահելի թիվ են կազմում, այս պատերազմով դրվեց ինքնարժևորման, ինքներս մեզ և թշնամուն ճանաչելու պատգամը։ Պատերազմից հետո ով էլ իշխանության լինի, ժողովուրդը պահանջատեր է լինելու, այս մթնոլորտն արդեն թևածում է օդում»,- Factor.am-ի հետ զրույցում նման տեսակետ է հայտնում երաժիշտ, երգահան Եղիշե Պետրոսյանը։

Նրա համոզմամբ՝ պատերազմից հետո ժողովուրդն իշխանությանը թույլ չի տա մատների արանքով նայել երկրի տնտեսությանը, դիվանագիտությանը, գիտության զարգացմանը։ Պարոն Պետրոսյանն ուրախություն է հայտնում, որ այսօր ժողովուրդը ցուցաբերում է միասնություն․ «Իսկ այն մասսան, որի արժեքային համակարգը պարփակված է «Որտեղ հաց, այնտեղ կաց» գաղափարի մեջ, այլևս չի կարող դոմինանտ լինել»։

Անդրադառնալով ներքին քաղաքական կյանքին, պարոն Պետրոսյանը շեշտում է․ ««Հինգերորդ շարասյունն» այսօր լյուստրացիա է անցնում»։ Ինչ վերաբերում է տարբեր շրջանակներից պարբերաբար հնչող նկատառումներին, թե նախորդ իշխանության օրոք երկիրը պատերազմական ծանր իրավիճակում չէր հայտնվի, երգահանը նկատում է․ «Էն որ ասում են՝ մենք իշխանության լինեինք՝ այսպես կլիներ, այնպես կլիներ․․․Պարզ երևում է, որ ով էլ իշխանության լիներ, այս իրավիճակն էր լինելու։ Դուք ձեր՝ իշխանություն եղած ժամանակ երկիր կառուցեիք․․․ Շատ վատ ժառանգություն մնաց հեղափոխական Հայաստանին, և ժամանակն էլ շատ կարճ էր․ դրանից օգտվեց թշնամին»։

Ինչ վերաբերում է միջազգային հանրության արձագանքին, երգահանը նշում է․ «Աշխարհն իրեն տվել է փողին, հաճույքներին ու նյութին և դարձել է ամուլ․․․Կյանքում էլ է այդպես․ երբ կա այլանդակ զորբա, դու նրան ավելի ես հանդուրժում, քան ինտելիգենտ մեկին, որը սուսուփուս իր գործն է անում։ Ամբողջ աշխարհի բարոյականությունը դրա վրա է հիմնված»։

Մանրամասները՝ տեսանյութում։

Աննա Բաբաջանյան