19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Երևանի և մյուս համայնքների ղեկավարները կունենան նոր տեղակալ՝ աշխարհազորային բրիգադը ղեկավարելու համար․ ԱԺ-ն ամբողջությամբ ընդունեց նախագծերը
Հասարակություն
03.11.2020 | 13:28
Ազգային ժողովն այսօր արտահերթ նիստում երկրորդ ընթերցմամբ և ամբողջությամբ ընդունեց «Տեղական ինքնակառավարման մասին» և «Երևան քաղաքում տեղական ինքնակառավարման մասին» ՀՀ օրենքներում փոփոխություններ կատարելու մասին նախագծերը։
Ըստ «Տեղական ինքնակառավարման մասին» օրենքում կատարված փոփոխության՝ տվյալ համայնքի պայմանական աշխարհազորային բրիգադի ղեկավարը պետք է լինի համայնքի ղեկավարի տեղակալը: Այս նախագիծը ստացավ 73 կողմ ձայն։
Իսկ «Երևան քաղաքում տեղական ինքնակառավարման մասին» ՀՀ օրենքում փոփոխություն կատարելու մասին նախագծով առաջարկվում է Երևանի քաղաքապետի տեղակալների թիվը 3-ից դարձնել 4: Առաջարկը պայմանավորված է Հայաստանում հայտարարված ռազմական դրությամբ:
Ներկայացված օրենսդրական նախագծի ընդունման արդյունքում կկարգավորվի Երևան քաղաքում քաղաքապետի տեղակալի՝ որպես համայնքի աշխարհազորային պայմանական բրիգադի ղեկավարի (հրամանատար) հաստիքի պարտադիր առկայության հարցը, ինչը հնարավորություն կտա ռազմական դրության պայմաններում համայնքում պաշտպանունակության ամրապնդմանը, պաշտպանության կազմակերպմանը։
Այս նախագիծը ԱԺ արտահերթ նիստում ստացավ 71 կողմ, 1 ձեռնպահ ձայն։
