«Սասնա ծռերի» ևս մեկ անդամ է հացադուլ հայտարարել. նա պահանջում է տեղափոխել իրեն մեկ այլ ՔԿՀ

«Սասնա ծռեր» խմբի ևս մեկ անդամ է հացադուլ հայտարարել: Factor.am-ի հետ զրույցում փաստաբան Հայկ Ալումյանն ասաց, որ իր պաշտպանյալ Սմբատ Բարսեղյանն արդեն երրորդ օրն է՝ հացադուլ է հայտարարել. «Մենք անցյալ շաբաթ դիմել էինք, որ նրան Նուբարաշենից տեղափոխեն «Արմավիր» ՔԿՀ, սակայն մինչ այժմ որևէ արձագանք չկա: Նա էլ որոշեց բողոքի նման ձև ընտրել»:

Մեր այն հարցին՝ հնարավոր է, որ իր պաշտպանյալի նկատմամբ ճնշումներ կան և դրանով է պայմանավորված այլ ՔԿՀ տեղափոխվելու պահանջը, Ալումյանը բացասական պատասխան տվեց:

Փաստաբանը տեղեկացրեց՝ Բարսեղյանը հացադուլը դադարեցնելու մտադրություն չունի, քանի դեռ իր պահանջները չեն իրագործվել:

Հիշեցնենք, որ Սմբատ Բարսեղյանը մեղադրվում է ոստիկանության գնդապետ Արթուր Վանոյանի, ոստիկանության ենթասպա Յուրի Տեփանոսյանի սպանության մեջ: Նրան մեղադրանք է առաջադրվել նաև ՀՀ քրեական օրենսգրքի 218-րդ հոդվածի 3-րդ մասի 1-ին կետով, 235-րդ հոդվածի 3-րդ մասով, 238-րդ հոդվածի 4-րդ մասի 1-ին ու 2-րդ կետերով՝ զենք, ռազմամթերք, պայթուցիկ նյութեր կամ պայթուցիկ սարքեր հափշտակելը կամ շորթելը՝ կազմակերպված խմբի կողմից և կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով: Սմբատ Բարսեղյանին սպառնում է ցմահ ազատազրկում:

Նշենք, որ այս խմբի մեկ այլ անդամ՝ Արմեն Բիլյանը 7-րդ օրն է, ինչ հացադուլ է հայտարարել: Հացադուլի պատճառն առողջական խնդիրներն են, որոնք, ըստ պաշտպանի, անհրաժեշտ ուշադրության չեն արժանանում:

Լիլիթ Շաբոյան