30.06.2026 | 13:34
Անահիտ Ավանեսյանը Թուրքիա կմեկնի. ՏԵՍԱՆՅՈՒԹ
Հռիփսիմե Խուրշուդյան. Վերադարձս մեծ սպորտ շատ սպասված է
22.12.2017 | 10:41
«Վերջապես լսեցի այդքան սպասված լուրը՝ 2018 թվականի մայիսից որակազրկումը կասեցվում է: Եւ այսօր ասում եմ՝ Հռիփսիմե Խուրշուդյանը վերադառնում է մեծ սպորտ»:
Նա միշտ եղել է կանանց հայկական ծանրամարտի առաջատարներից: Դոպինգ սկանդալը, որակազրկումը նրան հիասթափեցրին, բայց չկոտրեցին: Մարզվեց, հավատաց ու հույսով սպասեց: Հիմա արդեն պարզ է՝ սա նոր սկիզբ է: Հռիփսիմե Խուրշուդյանը ՀԱՕԿ լրատվականի հետ զրույցում խոսեց հիասթափությունների, վերադարձի ու նոր նպատակների մասին.
«Վերադարձս շատ սպասված է: Քնում եւ արթնանում էի լավ լուր լսելու հույսով: Երբ ՀԱՕԿ նախագահ Գագիկ Ծառուկյանը զանգեց ու ասաց, որ կարող եմ նորից մրցումների մասնակցել՝ քիչ էր մնում ուշագնաց լինեի ուրախությունից:
Չեմ պատկերացնում կյանքս առանց ծանրամարտի: 19 տարի ես այս մարզաձեւով եմ ապրում: Սա փորձություն էր, որը պետք էր հաղթահարել: Ես մեծ կամքի ուժ ունեմ եւ նահանջող մարդկանցից չեմ: Հիասթափություններ ունեցել եմ, չեմ ցանկացել ոչ մեկի հետ խոսել, շփվել: Կարծես հիշողությունս կորցրած լինեի, ագրեսիվ էի բոլորի հանդեպ, նույնիսկ երեխայիս հետ չէի կարողանում հանգիստ շփվել: Թշնամուս չէի ցանկանա այդ հիասթափությունը, հոգեկան ապրումները: Բայց իմ մեջ ուժ եմ գտել եւ հաղթահարել բոլոր դժվարությունները: Եւ այսօր ասում եմ՝ Հռիփսիմե Խուրշուդյանը վերադառնում է մեծ սպորտ:
Ես շատ շնորհակալ եմ Գագիկ Ծառուկյանին: Եթե նա չլիներ՝ ես չէի վերադառնա: Նա է ինձ ոգեւորել, ուժ տվել: Պարոն Ծառուկյանը միշտ ինձ հարցնում էր՝ արդյո՞ք մարզվում եմ: Նա ասում էր, որ ամեն ինչ կանի իմ վերադարձի համար: Ասաց եւ արեց»,- նշեց Հռիփսիմե Խուրշուդյանը:
