Ջալալ Հարությունյանի կյանքին վտանգ չի սպառնում․ Դավիթ Բաբայանը Արցախից մանրամասներ է հայտնում. ՏԵՍԱՆՅՈՒԹ

Factor.am-ի զրուցակիցն է Արցախի նախագահի խորհրդական Դավիթ Բաբայանը

-Ի՞նչ իրավիճակ է հիմա Արցախում, ո՞ր հատվածներում են ավելի թեժ մարտերը։ Պաշտոնապես հայտարարվեց, որ բերդաքաղաք Շուշին է թիրախավորվել։ Ի՞նչ տեղեկություն ունեք Դուք։

-Մոտավորապես մի 15-20 րոպե առաջ մենք լսեցինք հարձակման, հրթիռակոծման ձայները և իմացանք, որ Շուշին է թիրախավորվել։ Հակառակորդը շարունակում է իր այդ ահաբեկչական քաղաքականությունը։ Զոհերի և վիրավորների մասին դեռևս տեղեկություն չկա, ճշտվում են, այս պահի դրությամբ չեմ կարող հստակ ասել։
Հակառակորդը որևէ կերպ չի վերանայում իր մոտեցումները և շարունակում է ահաբեկչությունըւ։ Շուշիում որևէ ռազմական օբյեկտ չկա։ Այսինքն՝ սա նույն Ղազանչեցոց եկեղեցու շարունակությունն է։

-Պարոն Բաբայա՛ն, ինչպե՞ս է «Արցախի հերոս» Ջալալ Հարությունյանի առողջական վիճակը, արդյոք նա Արցախո՞ւմ է, թե՞ Երևան է տեղափոխվել։

-Փառք Աստծո, նրա կյանքին վտանգ չի սպառնում, այսօր էլ տեղեկացանք, որ նա արժանացավ Արցախի հերոսի կոչմանը։ Կարծում եմ, որ կապաքինվի։

-Ադրեբջանը որոշակի առաջխաղացում ունի որոշ շրջաններում, ի՞նչ եք կարծում, արդյոք կհաջողվի՞ թշնամուն հետ շպրտել ելման դիրքեր, թե՞ այս պահին ավելի ձեռնտու է պահպանել ունեցածը։

-Մենք կռվում ենք, մարտնչում են տղաները, անում են ամեն ինչ, որպեսզի պաշտպանեն, հարված կամ հակահարված տան, ժամանակը ցույց կտա, թե ինչպես է սա զարգանալու։

-Պատերազմի առաջին օրերի համեմատ, որոշ ռազմական փորձագետների գնահատմամբ, ռազմական գործողություններից դատելով թշնամին ուժասպառ է եղել, արդյոք կիսո՞ւմ եք այս տեսակետը։

-Ես չեմ ուզում պոպուլիստական ինչ-որ բաներ ասել,այո՛, թշնամին շատ մեծ կորուստներ է տվել, բայց մենք չպետք է ինքներս մեզ հանգստացնենք, ասենք ուժասպառ է եղել և այլն, այո՛, շատ մեծ կորուտսներ ունեն, բայց մենք պետք է անկախ ամեն ինչից շարունակենք կռվել և պաշտպանել մեր հայրենիքը՝ նրանց և՛ մարդկային, և՛ նյութական կորուստներ պատճառելով։

Մանրամասները՝ տեսանյութում։

Լիլիթ Շաբոյան