17.09.2026 | 23:38
Սամվել Կարապետյանի տնային կալանքը երկարաձգվել է
60 մլն դոլարն ուղղվելու է զոհվածների ու վիրավորների ընտանիքներին. Զինծառայողների հիմնադրամի տնօրեն
Հասարակություն
21.10.2020 | 22:30
Զինծառայողների ապահովագրության հիմնադրամը վերջին երեք շաբաթների ընթացքում կարողացել է հավաքագրել լրացուցիչ 4,5 մլն դոլար։ Վճարումների 80 տոկոսը ստացվել է Հայաստանից: Այս մասին Մամուլի ասուլիսում ասաց Զինծառայողների ապահովագրության հիմնադրամի տնօրեն Վարուժան Ավետիքյանը։
«Յուրաքանչյուր աշխատող քաղաքացի ամեն ամիս հիմնադրամին վճարել է 1000 դրամ, ինչի շնորհիվ նախորդ տարիներին հիմնադրամում կուտակվել է շուրջ 30 մլրդ դրամ։ Այդ գումարն ամբողջովին ուղղվելու է այս պատերազմի ընթացքում զոհված կամ հաշմանդամ դարձած զինծառայողներին ու նրանց ընտանիքներին։
Հատուցումներ են տրամադրվում նաև անհետ կորած զինծառայողների ընտանիքներին։ Յուրաքանչյուր զինծառայողի ընտանիքի տրամադրվում է 58-82 մլն դրամ։ Հատուցումը երկու եղանակով է լինում՝ սկզբում միանվագ վճար տվյալ ընտանիքին՝ 10 մլն դրամի չափով, եթե զինծառայողը զոհված է, անհետ կորած է կամ առաջին կարգի հաշմանդամություն ունի, 5 մլն դրամ, եթե երկրորդ կարգի հաշմանդամություն ունի։ Այնուհետև 240 ամիս շարունակ յուրաքանչյուր ամիս այդ ընտանիքներին վճարվում է 100-300 հազար դրամ։ Եթե զինծառայողն ունի 3 կամ ավելի երեխա, ապա ամսական լրացուցիչ 100 հազար դրամ է հատկացվում։
Այս պահին չափազանց կարևոր է, որ մեր հայրենակիցները ինչպես Հայաստանից, այնպես էլ Սփյուռքից մեզ կատարեն նաև նվիրաբերություններ, որովհետև, ցավոք սրտի, պատերազմը դեռևս չի ավարտվել, և մինչև կգա հաղթանակի օրը, սահմանին գտնվող մեր զինծառայողները պետք է վստահ լինեն, որ իրենց ընտանիքները ֆինանսապես ապահովված են լինելու»,- ասաց Ավետիքյանը։
Հիմնադրամի գործադիր տնօրենը Սփյուռքի ու Հայաստանի հայրենակիցներին կոչ արեց փոխանցումներ կատարել հիմնադրամին։ Նա նշեց, որ նվիրատվություն կատարելու համար ցանկացողները կարող են այցելել 1000plus.am կայքը, մուտքագրել քարտային տվյալները և վճարել իրենց ցանկացած գումարը: Նվիրատվություն կարելի է կատարել նաև բանկային փոխանցման միջոցով:
Մանրամասները՝ տեսանյութում:
