Ահաբեկիչները տեսանյութերում նշում են, որ շարունակելու են ահաբեկչական գործողությունները այլ երկրներում ևս․ Արման Թաթոյան

ԱԺ տարածաշրջանային և եվրասիական ինտեգրման հարցերի մշտական հանձնաժողովի այսօրվա նիստում քննարկվել է պատերազմական իրավիճակը:

Ադրբեջանի և Թուրքիայի կողմից Արցախի խաղաղ բնակչության նկատմամբ իրականացվող հանցագործությունների և Ադրբեջանի իրավական պատասխանատվության մասին հիմնական զեկույցով հանդես է եկել Մարդու իրավունքների պաշտպան Արման Թաթոյանը:

«Զինված հարձակումներն ուղեկցվում են քաղաքացիական բնակչության նկատմամբ թիրախային հարձակումներով։ Դրանք տարբերակում չդնող հարձակումներ են, իրականացվում են արգելված կասետային զինատեսակներից, իսկ դրանք արգելված են, քանի որ ոչ միայն մահ են առաջացնում, այլև կյանքը խեղող վնասվածքներ, և արգելված են միջազգային նորմերով:

Հաջորդ հանգամանքը ջիհադիստների մասնակցությունն է, որը ևս միջազգայնորեն հաստատված փաստ է: Ունենք ապացույցներ և դրանցով երեք կարևոր փաստ ենք առանձնացնում․առաջին՝ հաստատվում է փաստը, որ Արցախի դեմ զինված հարձակումներում կան ահաբեկիչներ, երկրորդ՝ կատարում են պատերազմական հանցագործություններ, երրորդ՝ տեսանյութերում նշում են, որ շարունակելու են ահաբեկչական գործողություններն այլ երկրներում ևս»,- նշել է Թաթոյանը:

Նա նաև հավելել է, որ այս բոլոր գործոնների թվում ևս մեկ հանգամանք կա՝ ատելության խոսքը: «Ակնհայտ է, որ Ադրբեջանում եղել է պետական բարձր աջակցություն վայելող ատելություն, դա կազմակերպված է։ Այն սոցցանցերի էջերը, խմբերը, օգտատերերը, որ կան, ինստիտուցիոնալ բնույթ են կրում։ Բռնության տեսարաններ տարածելով, թիրախավորելով երեխաների, տարեցների՝ պարարտ հող են ստեղծում լրացուցիչ դաժանությունների համար»:

ՄԻՊ-ը նշել է, որ այս ամենը պետք է դիտարկել որպես մեկ միասնական շղթային բաղադրատարրեր։ Վերլուծությունը ցույց է տալիս, որ խոսքը Հայաստանի ու Արցախի բնակչության նկատմամբ էթնիկ զտման մասին է:

Մանրամասները՝ տեսանյութում: