Այսօրվանից Իրանը զենք գնելու և վաճառելու իրավունք ունի. ՏԱՍՍ

ՄԱԿ-ի Անվտանգության խորհրդի 2231 բանաձևի համաձայն` Իրան  զենքի մատակարարումների, ինչպես նաև  երկրից սովորական զենքի արտահանման էմբարգոյի ժամկետը լրանում է այսօր՝ հոկտեմբերի 18-ին։ Այդ մասին հայտնում է ТACC   գործակալությունը՝ նշելով, որ իրանական միջուկային ծրագրի շուրջ իրավիճակի կարգավորման համար գործողությունների համապարփակ ծրագրի (JCPOA) ուժի մեջ մտնելուց անցել է 5 տարի ։

Դեռ հոկտեմբերի 14-ին  Իրանի նախագահ Հասան Ռոհանին շնորհավորել էր երկրի բնակչությանը զենքի էմբարգոյի ժամկետի ավարտի կապակցությամբ:

«Կիրակի օրը կվերանա տասը տարվա՝ զենքի դաժան էմբարգոն: Մենք դրա համար չորս տարի պայքարում էինք ԱՄՆ-ի դեմ: Չորս տարի շարունակ Միացյալ Նահանգներն արել է ամեն ինչ, որպեսզի դա տեղի չունենա, սակայն մի քանի օրից կգա այդ օրը: Դա մեր ժողովրդի դիմակայության շնորհիվ է: Դա մեր պաշտոնյաների և դիվանագետների ջանքերի շնորհիվ է: Սա «Համատեղ գործողությունների համապարփակ ծրագրի» առավելություններից մեկն է: Դրա շնորհիվ հանվում է զենքի էմբարգոն, և մենք կկարողանանք զենք գնել՝ ումից ցանկանանք և զենք վաճառել՝ ում ցանկանանք», – ասել էր Ռոհանին:

Իրանցի փորձագետ Ամիր Մուսավին նշել է, որ Իրանն արդեն 25 պայմանագիր է պատրաստել բարեկամական երկրներին զենք վաճառելու համար, որոնք սպասում են էմբարգոյի չեղարկմանը: Պետությունների անունները, սակայն, փորձագետը չի նշել:

Ի դեպ, Իրանի փորձագիտական շրջանակները հայտնում են, որ Թեհրանը զենքի ընդլայնված վաճառք է ծրագրում, Չինաստանից ու Ռուսաստանից էլ պատրաստվում է ավիատեխնիկա և զրահատեխնիկա գնել:

Իսկ, թե դա ինչ ազդեցություն կարող է ունենալ մեր տարածաշրջանում այս պատերազմական վիճակում FACTOR TV-ին անդրադարձել էր այս հրապարակման մեջ։