19.04.2026 | 23:45
Գետերում նկատվում է ջրի մակարդակի բարձրացում. ՆԳՆ ՓԾ-ն անցել է ուժեղացված ծառայության
Իրանը վերսկսում է զենքի վաճառքը. ինչպես դա կանդրադառնա պատերազմի վրա. ՏԵՍԱՆՅՈՒԹ
Քաղաքականություն
15.10.2020 | 21:16
Իրանի Իսլամական Հանրապետությունը զենքի ազատ առևտրով կարող է զբաղվել հոկտեմբերի 18-ից: Այս մասին հայտնել է նախագահ Հասան Ռոհանին՝ նշելով, որ տասը տարվա դաժան էմբարգոն վերանում է:
Իրանի դեմ սահմանված զենքի էմբարգոյի վերացումը, ըստ քաղաքագետ Արա Պապյանի, Հայաստանի համար նոր հնարավորություններ է բացում: Իրանում Հայաստանի դեսպանության նախկին երկրորդ քարտուղարի պաշտոնը զբաղեցրած Պապյանը կարծում է՝ տարածաշրջանում ընթացող ռազմական գործողությունների ֆոնին նաև Թեհրանի համար է ձեռնտու, որ Երևանը համագործակցության եզրեր գտնի:
Իրանցի փորձագետ Ամիր Մուսավին նշել է, որ Իրանն արդեն 25 պայմանագիր է պատրաստել բարեկամական երկրներին զենք վաճառելու համար, որոնք սպասում են էմբարգոյի չեղարկմանը: Պետությունների անունները, սակայն, փորձագետը չի նշել:
Այժմ հետաքրքիր է, թե ինչի կհանգեցնի Իրանի նկատմամբ զենքի էմբարգոյի վերացումը: Արա Պապյանի խոսքով՝ Թեհրանը Բաքվին զենք վաճառելու հարցում շատ զգույշ է լինելու: Պապյանը չի կարծում, որ եթե Հայաստանը Իրանից զենք ձեռք բերի, ապա սա Ռուսաստանի հետ նոր խնդիրների առաջացման պատճառ կդառնա: Նա մատնանշում է՝ մեր ռազմավարական դաշնակից համարվող Ռուսաստանն է զենք վաճառում թշնամի Ադրբեջանին:
ԱԺ Հայաստան-Իրան բարեկամական խմբի անդամ Տաթևիկ Հայրապետյանը կարծում է՝ վաղ է խոսել, թե զենքի առք ու վաճառքի հայ-իրանական ինչպիսի համագործակցություն կձևավորվի: Սակայն իշխանական խմբակցության պատգամավորը շեշտում է՝ Իրանը հակամարտող կողմերին զենք վաճառելուց առաջ իր աշխարհաքաղաքական շահը հաշվի կառնի:
Իրանը տնտեսական շահեր ունի Ադրբեջանի և Թուրքիայի հետ: Տաթևիկ Հայրապետյանն այս առումով ուշադրություն է հրավիրում այն հանգամանքի վրա, որ Իրանին առաջնային հետաքրքրում է իր տարածքային անվտանգությունը:
Ի դեպ, Իրանի փորձագիտական շրջանակները հայտնում են, որ Թեհրանը զենքի ընդլայնված վաճառք է ծրագրում, Չինաստանից ու Ռուսաստանից էլ պատրաստվում է ավիատեխնիկա և զրահատեխնիկա գնել:
Քաղաքագետ Արա Պապյանը նշում է՝ եթե Հայաստանը իրանական զենք ձեռք բերի, ապա այս շրջանում հասարակությանն ամբողջական տեղեկատվություն հասանելի չի լինի:
Մանրամասները՝ տեսանյութում:
Նարեկ Կիրակոսյան
