Քաղաքականություն
18.12.2017 | 11:55
Եվրամիությունը 20-25%-ով կավելացնի ֆինանսական աջակցությունը Հայաստանի զարգացման ծրագրերին: Այս մասին այսօր «Քաղաքացիական հասարակության դերը Հայաստանում հանրային քաղաքականության օրակարգի ձևավորման և հաշվետու կառավարումն ապահովելու մեջ» թեմայով հանրային քննարկման ժամանակ հայտարարեց Հայաստանում ԵՄ պատվիրակության ղեկավար, դեսպան Պյոտր Սվիտալսկին:
«Եվ այս աջակցության 15%-ն ուղղված է լինելու քաղհասարակության ոլորտի ծրագրերի իրականացմանը և զարգացմանը: Մենք ցանկանում ենք շարունակել այն նոր փիլիսոփայությունը, որը գործադրում ենք քաղհասարակության զարգացման աջակցության շրջանակներում Հայաստանում: Հիմնական բաղադրիչն, առաջին հերթին, ենթադրամաշնորհների հետ աշխատանքն է: Այսինքն՝ մեծ ֆինանսական ծրագրերը բաժանում ենք փոքր մասերի, որոնք ավելի հեշտ է վերահսկել՝ քաղհասարակության մեր գործընկերների հետ աշխատանքում: Ենթադրամաշնորհների գաղափարախոսությունը մենք հիմա ուսումնասիրում ենք մեր առաջնահերթության ծրագրերում, սա այն փիլիսոփայությունն է, որ մենք շարունակում ենք իրականացնել»,- ասաց դեսպանը:
ԵՄ դեսպանը, կարևորելով քաղհասարակության ակտիվությունը մարզերում, ընդգծեց. «Գալիք շաբաթների ընթացքում մենք դրամաշնորհ կստորագրենք, որը ենթադրում է քաղաքացիական մասնակցային բյուջետային ծրագրերի իրականացում՝ հեռավոր համայնքներում: Մենք ցանկանում ենք պրակտիկ կերպով ցույց տալ այն հաջողված փորձը, որ տեղի է ունեցել ԵՄ-ում, երբ համայնքները սեփական միջոցներով, հիմք ընդունելով ՀԿ-ների կողմից ծրագրված միջոցառումները, որոշել են, թե փողն ինչպես պետք է ծախսվի, ուր պետք է գնա: Այժմ մենք քննարկում ենք դա, ցանկանում ենք այս պիլոտային ծրագիրը մշակել և իրականացնել, առաջին հերթին, մեծ համայնքներում»:
Ինչ վերաբերում է քաղաքացիական հասարակության դերակատարությանը՝ Հայաստան-ԵՄ համաձայնագրի կոնտեքստում, ապա Պյոտր Սվիտալսկին շեշտեց՝ նրանց առաջադրանքը ոչ թե միտված է ՀՀ-ԵՄ համաձայնագրի դրույթների իրականացմանը, այլ շատ ավելի լայն պետք է լինի: Ըստ դեսպանի՝ այն պետք է կապված լինի իրականացման գործընթացին անմիջական մասնակցության հետ:
«Այսինքն՝ սա պետք է լինի բավականին ակտիվ դեր: Կան նաև այլ խնդիրներ, որոնք կապված են համաձայնագրի իրականացման հետ, և համոզված եմ, որ քաղհասարակության ներգրավվածությունն ու ձայնն այստեղ չափազանց կարևոր են»,- շարունակեց դեսպանը՝ նկատելով, որ ՀՀ-ԵՄ համաձայնագրի ստորագրումը ավետարան կհանդիսանա երկու երկրների համար:
«Բայց չենք կարող գոհանալ այն արդյունքներից, որոնց հասել ենք, շատ ավելի շոշափելի արդյունքների կհասնենք՝ համագործակցելով ՀՀ կառավարության հետ և լուծելով Հայաստանի համար ամենահրատապ խնդիրները»,- եզափակեց Հայաստանում ԵՄ պատվիրակության ղեկավարը:
Շողիկ Գալստյան
