Իմ տնեցիքից հեռու մնացեք, եթե ես էլ ձեր տնեցիքին կպա՝ կմռմռաք. Սեֆիլյանի գործով ամբաստանյալ Ներսես Պողոսյան

Այսօր Ժիրայր Սեֆիլյանի և մյուսների գործով դատական նիստին իրեն առաջադրված մեղադրանքի վերաբերյալ նախ ցուցմունք տվեց ամբաստանյալ Գալուստ Գրիգորյանը, ապա Ներսես Պողոսյանը:

Վերջինս նախքան ցուցմունք տալը հանդես եկավ հայտարարությամբ, նա շնորհավորեց Ալիևին՝ նշելով, որ բոլոր այն մարդիկ, ովքեր Հայաստանի համար սրտացավ են, երբևէ պայքարել են երկրի պաշտպանության համար այժմ բանտերում են. «Ես էլ մասնակցել եմ բազմաթիվ ակցիաների ու հայացքներիս համար, հիմա ճաղերի հետևում եմ: Ինձ գալիս ասում են՝ կներես վրիպակ էր, քո տանից զենք չենք գտել, դա ուղղակի գրվել էր»:

Շենգավիթ վարչական շրջանի ընդհանուր իրավասության դատարանի դատավոր Տաթևիկ Գրիգորյանը մի քանի անգամ Պողոսյանին զգուշացրեց քննիչների մասին խոսելիս պահպանել կոռեկտությունը, քանի որ ամբաստանյալը քննիչների մասին խոսելիս հաճախ էր տարբեր ածականներ գործածում: «Ես մի հատ բան եմ ասում՝ իմ տնեցիքից հեռու մնացեք, եթե ես էլ ձեր տնեցիքին կպա՝ կմռմռաք: Ո՞նց է ստացվում, որ մայրս վթարի է պատահական ենթարկվում, խելքը տեղը հասցնում են հիվանդանոց, բայց տասնմեկ օր կոմայի մեջ է մնում, եղբորս մեքենայի անվադողերն են կորել».- դատարանում բարկացած հայտարարեց Պողոսյանը, իսկ հայտարարությունն ավարտելուց հետո դատախազին ասաց՝ հարցերդ տուր, տենամ ի՞նչ ես ասում:

Դատախազը նշեց՝ այստեղ Դուք-ով ենք խոսում, որին ի պատասխան Պողոսյանն ասաց՝ տեղիք ես տվել: Դատավորը զգուշացրեց, որ Պողոսյանը հարգալից, հանգիստ ու հավասարակշիռ լինի, դատավարության մասնակիցներին էլ Դու-ով չդիմի: Պողոսյանն ասաց՝ չի լինի: Նա շեշտեց՝ որ ինքը միշտ կարծել է, հիմա էլ է կարծում, որ մարդիկ, ովքեր կարող են զոհված զինվորի մոր ծեծել, չպիտի ապրեն մեր երկրում. «Հիմա էլ եմ ասում, պատգամավորները, որոնք հայտարարում են, որ աղքատը կարագ ու միս չպիտի ուտի, նման մարդկանց ոտքերը պետք է ջարդել»:

Այս հայտարարությունից հետո դատարանի դահլիճում ներկաները ծափահարեցին Պողոսյանին: Նա նաև իր ցուցմունքում նշեց, որ զանգվածային անկարգությունների մասին խոսակցություն երբևէ չի եղել:

Լիլիթ Շաբոյան