Սոցփաթեթի շահառուները կկարողանան գումարն ուղղել հիմնադրամներին. ԱԺ-ն ընդունեց առաջին ընթերցմամբ. ՏԵՍԱՆՅՈՒԹ

Ազգային ժողովն առաջին ընթերցմամբ ընդունեց նախագիծ, որով հնարավորություն կտրվի սոցփաթեթից օգտվող անձանց այդ գումարներն ուղղել այն հիմնադրամներին, որոնց գործունեությունն ուղղված է ՀՀ կայուն ու համաչափ զարգացումն ապահովվող ծրագրերի իրականացմանը:

Կառավարության ներկայացրած «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացում կատարելու մասին նախագիծը ստացավ 99 կողմ ձայն։

«Նախագծի ընդունման անհրաժեշտությունն առաջացել է այն պատճառով, որ պայմանավորված ռազմական դրությամբ մի շարք պետական պաշտոններ և պետական ծառայության պաշտոններ զբաղեցնող անձինք ցանկանում են մասնակցել ռազմական դրության արդյունքում պետության կարիքների ֆինանսավորման համար իրականացվող դրամահավաքներին: Ներկայումս սոցիալական փաթեթի ուղղությունները սահմանված են օրենքով և դրանից բացի այլ ուղղություններով նշված գումարները չեն կարող օգտագործվել:

Հաշվի առնելով ստեղծված իրավիճակը, նպատակահարմար է համարվում օրենքում փոփոխություններ կատարելու միջոցով հնարավորություն ընձեռել սոցիալական փաթեթի գումարներն ուղղել նաև այն հիմնադրամներին, որոնց գործունեությունն ուղղված է Հայաստանի Հանրապետության կայուն ու համաչափ զարգացում ապահովվող ծրագրերի իրականացմանը, տնտեսության կայունացման օժանդակմանը կամ այլ համապետական ծրագրերի իրականացմանը»,- նշված է նախագծի հիմնավորման մեջ:

ՀՀ աշխատանքի և սոցիալական հարցերի փոխնախարար Ռուբեն Սարգսյանի խոսքով՝ սա այս պահին վերաբերում է Զինծառայողների ապահովագրության հիմնադրամին և Հայաստանի համահայկական հիմնադրամին:

Մանրամասները՝ տեսանյութում։