«Շահերի բախում Լեռնային Ղարաբաղում»․ ինչո՞վ է պայմանավորված ԼՂ հակամարտության սրումը․ Le Figaro

Պուտինի Ռուսաստանն ու Էրդողանի Թուրքիան Կովկասում՝ Սիրիայից ու Լիբիայից հետո պոտենցիալ երրորդ ճակատում, գնահատող հայացքով նայում են միմյանց»,- գրում է Ալեն Բարլյուեն Le Figaro-ում։

«Բազմաթիվ փորձագետների կարծիքով՝ Լեռնային Ղարաբաղում նոր հակամարտությունը, ամենայն հավանականությամբ, կապված է Սիրիայում տիրող իրավիճակի հետ, որտեղ Թուրքիայի ծրագրերը ձախողեցին ռուսական օպերացիաները, և Լիբիայում, որտեղ թուրքական հաջողությունը ևս չափազանց սահմանափակ է»,- նշվում է հոդվածում։

«Ինչպես Սիրիայում, այնպես էլ Լիբիայում թուրքական քաղաքականությունը փակուղի է մտել»,- կարծում է քաղաքագետ Իլյա Գրաշենկովը։ Նրա կարծիքով՝ հենց սրանով է բացատրվում Կովկասում Անկարայի կողմից երրորդ ճակատի բացումը։

«Թուրքիան որոշել է ճնշում գործադրել Ռուսաստանի վրա, բայց ոչ թե նրա հետ առճակատման, այլ Սիրիայի ու Լիբիայի հարցերով բանակցություններում իր դիրքերն ամրապնդելու շուրջ»,- հայտարարել է փորձագետը Le Figaro-ին։

Միաժամանակ Իրանը՝ «ղարաբաղյան հակամարտության եռանկյունու» երրորդ մասնակիցը, փորձում է ամրապնդել իր դիրքերը Հարավային Կովկասում՝ խաղադրույք կատարելով տարածաշրջանում իր գլխավոր դաշնակցի՝ Հայաստանի վրա, նշվում է հոդվածում։

«Ինչքան էլ պարադոքսալ է, սակայն պատմական ու հումանիտար պատճառներով Իսլամական Հանրապետության ու Ադրբեջանի հետ հարաբերությունները շատ ավելի սառն են, քան Հայաստանի հետ»,- գրում է Le Figaro-ն։

Պարբերականի հետ զրույցում փորձագետներից մեկը կարծիք է հայտնել, որ նավթի գնանկմամբ պայմանավորված տնտեսական իրավիճակի վատթարացման ֆոնին ու  կորոնավիրուսով պայմանավորված իրավիճակով՝ Ադրբեջանը «որոշել է օգտագործել հայրենասիրական մոբիլիզացիան՝ բնակչության վրա ազդեցություն ունենալու համար»։

Ըստ նրա՝ Բաքվում, հնարավոր է, ցանկություն է առաջացել «հիշողությունից ջնջել հուլիսյան պատերազմի անհաջողությունները»։

Ռուս և արևմտյան փորձագետները նաև նշում են «թուրքական գործոնը», նկատի ունենալով այն, որ «Ռեջեփ Թայիփ Էրդողանը ձգտում է իրեն ներկայացնել բոլոր մահմեդականների ու թուրք ժողովուրդների առաջնորդ»։

Տաթև Ֆռանգյան