06.03.2026 | 18:54
Հայաստանի Պրեմիեր լիգան վերադարձավ գոլառատ խաղով․ ՏԵՍԱՆՅՈՒԹ
Եթե Կարեն Կարապետյանը պատրաստված անձնավորություն չլիներ, մենք այս ընթացքում նրան՝ որպես վարչապետի, վստահություն չէինք հայտնի. Վահրամ Բաղդասարյան
Քաղաքականություն
14.12.2017 | 14:11
Ցանկացած պատասխանատու պաշտոն զբաղեցնող անձ պետք է լինի հեղինակություն: Այս մասին լրագրողների հետ զրույցում ասաց ԱԺ ՀՀԿ խմբակցության ղեկավար Վահրամ Բաղդասարյանը՝ անդրադառնալով 2018 թվականի վարչապետի հնարավոր թեկնածուի մասին հարցին:
«Չի կարող լինել անվիճելի անձ, որովհետև մեր երկրում կա բազմակուսակցականություն: Երբ կան ընդդիմադիր և իշխանական քաղաքական ուժեր, այստեղ այդ ձևակերպման հետ համաձայն չեմ», – ասաց ՀՀԿ խմբակցության ղեկավարը:
Factor.am-ի հարցին՝ կիսո՞ւմ է ՀՅԴ խմբակցության ղեկավար Արմեն Ռուստամյանի տեսակետը, որ Կարեն Կարապետյանը կարող է փոխարինել Սերժ Սարգսյանին նաև անվտանգությանն ու արտաքին քաղաքականությանն առնչվող հարցերում, որով ըստ էության, ակնարկում է, որ անփոխարինելի անձինք չկան, Վահրամ Բաղդասարյանը պատասխանեց. «Գիտեք՝ վիճելի հարց է՝ փոխարինելի, անփոխարինելի: Անփոխարինելի մարդիկ ընդհանրապես չկան, և այդ մասին համեստորեն խոսում է նաև հանրապետության նախագահը: Եթե Կարեն Կարապետյանը պատրաստված անձնավորություն չլիներ, մենք այս ընթացքում նրան՝ որպես վարչապետի, վստահություն չէինք հայտնի: Եթե մենք նրան կարևորագույն պոստերից մեկն ենք վստահել՝ ՀՀ վարչապետի պոստը, մենք հաշվի ենք առել նրա պատրաստակամությունը»:
Ավելի վաղ Factor.am-ի հետ զրույցում Արմեն Ռուստամյանը կարծիք էր հայտնել, որ Կարեն Կարապետյանը կարող է փոխարինել Սերժ Սարգսյանին:
Մանրամասները՝ տեսանյութում:
Շողիկ Գալստյան
