Բացառիկ ռեպորտաժ հրետակոծվող Մարտակերտից. ՏԵՍԱՆՅՈՒԹ

Արդեն վեց օր Արցախի առաջնագծում ակտիվ ռազմական գործողություններ են։ Factor TV-ի նկարահանող խումբն այս ընթացքում ակտիվ աշխատում է Արցախում։

Այսօր բացառիկ նկարահանումներ են իրականացվել Մարտակերտ քաղաքում, որն անընդհատ հրետակոծվում էր։ Երկու օր առաջ ադրբեջանական ուղղաթիռը հայտնվել է քաղաքի երկնքում։ Ավիահարվածներից քաղաքացիական երեք անձ է մահացել, երկուսը՝ վիրավորվել։ Այսօր կեսօրի տվյալներով՝ Մարտակերտը քաղաքացիական բնակչությունից կորուստներ չի տվել։

Տեղացիների ուղեկցությամբ Factor TV-ի նկարահանող խումբը շրջեց հրետակոծվող Մարտակերտի փողոցներում։ Շուրջբոլորը քանդված շինություններ են, ադրբեջանական բանակը թիրախի տակ է առել նաև դպրոցի շենքը։ Փողոցներում շրջելիս հարվածներ էին հասցվում Մարտակերտի տարբեր հատվածներին։

Անվտանգության որևէ երաշխիք չկար լրագրողների համար ևս, որոնք Press գրությամբ հանդերձանքով էին։ Նկարահանումներն ուղեկցվում էին պայթյուններով։ Մարտակերտից Ստեփանակերտ հետդարձի ճանապարհին Ադրբեջանի զինված ուժերը թիրախավորեցին լրագրողական մեքենան, որի մեջ էին Factor TV-ի, «Շանթ» հեռուստաընկերության և ռուսական լրատվամիջոցների ներկայացուցիչներ։

Լրագրողների ավտոմեքենան հայտնվեց ադրբեջանական կրակահերթի տակ։ Պայթյուններից փշրվեց ավտոմեքենայի ապակին։ Կանգնեցնելով ավտոմեքենան՝ լրագրողները հապշտապ դուրս եկան մեքենայից, պատսպարվեցին ապաստարանում, և երբ հարաբերական անդորր հաստատվեց, շարունակեցին ճանապարհը։ Ադրբեջանի բանակը վրիպեց՝ բոլոր լրագրողներն անվնաս են։

Հիշեցնենք, որ երեկ էլ Մարտունիում Ադրբեջանը կրակ էր բացել լրատվամիջոցների ներկայացուցիչների ուղղությամբ, վիրավորվել էին ֆրանսիական Le Monde-ի և հայաստանյան լրագրողներ։

Մանրամասները՝ տեսանյութում։

Ռոբերտ Անանյան

Արթուր Դևրիկյան