Ամանորյա տոներին քանի օր կհանգստանան քաղաքացիները

Ամանորյա և Սուրբ Ծննդյան տոների հետ կապված 2017 թվականի դեկտեմբերի 29-ից մինչև հունվարի 8-ը կլինեն  ոչ աշխատանքային օրեր: Այս մասին Factor.am-ի հետ զրույցում ասաց ՀՀ վարչապետ Կարեն Կարապետյանի մամուլի խոսնակ Արամ Արարատյանը:

Վարչապետի խոսնակի փոխանցմամբ, սակայն, հաջորդ տարի տոնական օրերը կկրճատվեն:

Նշենք, որ Կառավարությունը փոփոխություններ է նախաձեռնել ՀՀ «Տոների և հիշատակների մասին» օրենքում, որոնցով առաջարկվում է հունվարի 3-ը, 4-ը և  5-ը չհամարել նախածննդյան տոներ: Ազգային ժողովի կողմից ընդունվելու դեպքում փոփոխություններն ուժի մեջ կմտնեն 2018 թվականի հունիսի 1-ից:

Նախագծի ընդունման անհրաժեշտությունը պայմանավորված է հայաստանյան տոնացույցում միայն հայ ժողովրդի ավանդույթներից բխող Ամանոր և Ծննդյան տոներ նախատեսելով։ Նախածննդյան տոները ոչ աշխատանքային սահմանելը նպատակահարմար չէ նաև սոցիալ-տնտեսական տեսանկյունից։

Ըստ օինագծի հեղինակների՝ Հայաստանում ամենամյա նվազագույն արձակուրդի տևողությունը 28 օրացույցային օր է, որին գումարվում է 15 ոչ աշխատանքային օր` ազգային տոներ և հիշատակի օրեր, արդյունքում ստացվում է տարեկան նվազագույնը 43 վճարվող հանգստյան օր:

Կառավարությունում գտնում են, որ ՀՀ աշխատանքային օրենսդրությամբ ՀՀ քաղաքացուն տրամադրվող վճարվող ոչ աշխատանքային օրերի թիվն արդեն իսկ գերազանցում է շատ զարգացած և առավել ևս զարգացող երկրներում առկա վճարվող ոչ աշխատանքային օրերի թվին։

Նախագծի ընդունումը, ըստ հեղինակների, միտված է պետության սոցիալական-տնտեսական և ֆինանսական համակարգերի նորմալ կենսագործունեության ապահովմանը։