30.06.2026 | 16:35
Վարչապետն ընդունել է Վրաստանի ՆԳ նախարարին
Երևանում մեկնարկել է ՀՄՄ Սպեկտրի կառավարման հարցերով տարածաշրջանային համաժողովը
Տնտեսություն
12.12.2017 | 17:33
Երևանում դեկտեմբերի 12-ին մեկնարկեց Հեռահաղորդակցության միջազգային միության Սպեկտրի կառավարման հարցերով տարածաշրջանային եռօրյա համաժողովը: Հայաստանում այն անցկացվում է ՀՀ տրանսպորտի, կապի և տեղեկատվական տեխնոլոգիաների նախարարության, Հեռահաղորդակցության միջազգային միության և «Forum Global» ընկերության համատեղ ջանքերով:
Համաժողովի աշխատանքներին մասնակցելու են ժամանել աշխարհի տարբեր երկրների շուրջ 100 ներկայացուցիչներ` ՀՄՄ անդամ-պետությունների նախարարություններից, կարգավորող գործակալություններից, հեռահաղորդակցության օպերատոր ընկերություններից, գիտական և նախագծային ինստիտուտներից:
«Ռադիոկապի ռեգլամենտի գործնական օգտագործում». համաժողովի առանցքային թեման է:
Հանդես գալով ողջույնի խոսքով՝ ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը նշեց, որ Հայաստանը Հեռահաղորդակցության միջազգային միության անդամ է 1992 թվականից: Մեր երկրի համար միշտ եղել ու մնում է առաջնահերթ միության շրջանակներում գործունեությունը, քանի որ այն կառուցված է բոլոր կողմերի շահերի հավասարակշռվածության սկզբունքի վրա:
«Դինամիկ զարգացող համաշխարհային տնտեսության պայմաններում Հայաստանը շատ առումներով պատրաստ է զարգացած հեռահաղորդակցության ենթակառուցվածքի հաշվին չորրորդ տեխնոլոգիական «խոչընդոտի» հաղթահարմանը: Այդ համատեքստում ռադիոհաճախականության սպեկտրի կառավարման հարցերը, դրա օպտիմալ օգտագործման սկզբունքները ձեռք են բերում հատուկ նշանակություն: Ռելիեֆի դժվարության առանձնահատկություններով պայմանավորված՝ մեր հանրապետության, ինչպես նաև ամբողջ տարածաշրջանի սպեկտրի օպտիմալացման անհրաժեշտության ավանդական հարցերին ներկայում գումարվում են նաև ռադիոհաճախականության սպեկտրի ռեսուրսների փոխակերպման օգտագործման խնդիրները»,- նշեց նախարարը:
