Քաղաքականություն
28.09.2020 | 14:53
Բելառուսում հերթական զանգվածային բողոքի ցույցերն են՝ ընդդեմ գործող իշխանության։ Ամենազանգվածային ակցիաները կրկին Մինսկում են ընթացել։ Չնայած ուժայինների լուրջ պատրաստվածությանը՝ ցուցարարները քայլերթով անցել են մայրաքաղաքի գլխավոր փողոցներով, գրում է BBC-ի ռուսական ծառայությունը։
Հաղորդվում է, որ Գոմելում իրավապահները ցուցարարների դեմ կիրառել են արցունքաբեր գազ։
Հավելենք, որ Բելառուսում արդեն 50-րդ օրն է՝ ցուցարարները փողոց են դուրս գալիս։
Ընդդիմադիր գործիչ Սվետլանա Տիխանովսկայան իր աջակցությունն է հայտնել ընդդիմադիրներին ու կոչ արել կանգնեցնել վարչակազմին խաղաղ ճանապարհով։
«Ժողովրդավարությունը ժողովրդի իշխանությունն է։ Իսկ մի ամբողջ ազգ ավելի ուժեղ է, քան մեկ մարդը, չէ՞ որ ազգը պայքարում է իր իրավունքների, ապագայի ու մեր երեխաների ապագայի համար»,- հավելել է նա։
Ալեքսանդր Լուկաշենկոն ընթացող ցույցերի վերաբերյալ ոչինչ չի ասել, փոխարենը շնորհավորել է մեքենաշինարարներին՝ մասնագիտական տոնի առթիվ։
