600 դոլար ամսավճար․ 1․000 ահաբեկչից կազմված թուրքական դիվիզիան տեղափոխվել է Ադրբեջան․ նոր մանրամասներ

Հավաստի տեղեկություններ են հայտնվել այն մասին, որ Թուրքիան Հյուսիսային Սիրիայում մարտնչող իր զինվորականներին տեղափոխում է Ադրբեջան՝ հայ-ադրբեջանական հարաբերությունների սրման ֆոնին, գրում է Greek City Times-ը։

Բազմաթիվ մրցանակների արժանացած լրագրող Լինդսի Սնելը, որը Սիրիայի հյուսիսում ժամանակին առևանգվել է Թուրքիայի աջակցությունը վայելող ահաբեկիչների կողմից, իսկ Սիրիայից փախչելուց հետո երկու ամիս բանտարկվել է Թուրքիայում, Twitter– ում գրել է, որ Համզայի դիվիզիայի մարտիկները Թուրքիայի տարածքով ժամանել են Ադրբեջանի մայրաքաղաք Բաքու։

Տարեսկզբին Համզայի դիվիզիան մեղադրվել է բանտերում բռնության ենթարկված ու մերկ կանանց պահելու համար: Այս դիվիզիան, որը հիմնականում արաբներից և թուրքմեններից է բաղկացած, Թուրքիայի նախագահ Ռեջեփ Թայիփ Էրդողանի համար դարձել է շարժական վստահված ուժ:

Այս տարեսկզբին, Լիբիայի պատերազմի սրումից հետո, Համզայի դիվիզիան հիմնական մարտական ​​խմբերից էր, որը Թուրքիան տեղափոխեց հյուսիսաֆրիկյան այս երկիր։ 2․000 դոլար ամսական աշխատավարձի խոստումը սիրիացի ջիհադիստներից շատերի համար գայթակղիչ էր, սակայն հունիսին դիվիզիայի ղեկավարը հայտարարել է․ «Հիմա ափսոսում ենք, որ եկել ենք: Մեր վճարած գինը շատ բարձր է»:

Ի հավաստում իր հրապարակումների՝ լրագրողը նաև ձայնային հաղորդագրություն է հրապարակել, որում մի զինյալ պնդում է, թե մինչև 1․000 մարտիկներ տեղափոխվելու են Ադրբեջան:

Syriana Analysis լրատվականի հիմնադիր, ազգությամբ հայ Գևորգ Ալմասյանը, ում եղբորն առևանգել էին Թուրքիայի աջակցությունը վայելող ջիհադիստները, հայտնել է, որ սիրիական ընդդիմության աղբյուրները պարզել են, որ ջիհադիստներին առաջարկվում է ամսական 600 դոլար աշխատավարձ՝ Ադրբեջանի հետ Հայաստանի դեմ կռվելու համար:

Հավելենք, որ Greek City Times-ի այս հրապարումն արտատպել են բազմաթիվ պարբերականներ։