ՀՊՏՀ Գյումրու մասնաճյուղում դասերը դադարեցված չեն․ բուհը, սակայն, միանում է ընտրված ռեկտորին պաշտոնում նշանակելու պահանջին

Հայաստանի պետական տնտեսագիտական համալսարանի կոլեկտիվի կողմից ձևավորված կազմկոմիտեն նախօրեին հայտարարություն էր տարածել, ըստ որի, բուհի կոլեկտիվի գերակշիռ մեծամասնության որոշմամբ, ժամանակավորապես դադարեցվում է ուսումնական գործընթացը՝ մինչև Դիանա Գալոյանի՝ օրենքով սահմանված կարգով ռեկտորի պաշտոնում նշանակումը։

Ի տարբերություն մայր բուհի՝ ՀՊՏՀ Գյումրու մասնաճյուղում դասապրոցեսը դադարեցված չէ, դասերը բնականոն հունով շարունակվում են։ Ստեղծված իրավիճակի շուրջ բուհն իր դիրքորոշումն արտահայտել է հայտարարությամբ։

«Մենք մեր դիրքորոշումը, տնօրինության որոշմամբ, արտահայտել ենք, հայտարարություն ենք տարածել և կոչ ենք արել ՀՀ Կառավարությանը՝ հնարավորինս սեղմ ժամկետներում օրենքով սահմանված կարգով այս հարցին լուծում տալ։ Որովհետև այսպիսի իրավիճակը խաթարում է ոչ միայն մայր բուհի, այլև մասնաճյուղի ուսումնական և ոչ ուսումնական գործընթացները, բնականոն գործունեությունը»,- Factor.am-ի հետ զրույցում ասաց ՀՊՏՀ Գյումրու մասնաճյուղի Զարգացման ծրագրերի, գիտության, որակի ապահովման և արտաքին կապերի  բաժնի վարիչ Ղարիբ Հարությունյանը։

Նա նշեց, որ բուհի դիրքորոշումն է, որ խորհրդի կողմից ընտրված ռեկտորը նշանակվի այդ պաշտոնում։

«Քանի որ տեղի է ունեցել կառավարման խորհրդի նիստ, այն վավեր է եղել, Դիանա Գալոյանն ընտրվել է ռեկտոր, մեր դիրքորոշումն այն է, որ ընտրված ռեկտորը պիտի նշանակվի։ Ուրիշ բան է, եթե գործընթացը կասկածի տակ առնվեր և նշվեր, որ նիստը չի կայացել, Կառավարությունը նման դիրքորոշում ունենար, դա ուրիշ կլիներ։ Բայց, փաստորեն, նիստը կայացել է, ռեկտորն ընտրվել է, բայց չի նշանակվել։ Հաջորդ փուլը, նաև ըստ բուհի կանոնադրության, խորհրդի ընտրությունից հետո Կառավարության կողմից նշանակումն է։ Արդեն մոտ 2 ամիս է անցել նիստից, բայց Կառավարությունը դեռ չի նշանակել։ Սա նաև անորոշ վիճակ է ստեղծել մեր մասնաճյուղի ու մայր բուհի փոխհարաբերություններում»,- ասաց Ղարիբ Հարությունյանը։

Նա նաև հավելեց, որ ուշադրությամբ հետևում են մայր բուհում տեղի ունեցող իրադարձություններին։

Հավելենք, որ ՀՊՏՀ Գյումրու մասնաճյուղի տնօրինությունը հանդես է եկել հետևյալ հայտարարությամբ։

«Ողջունելով ՀՊՏՀ կոլեկտիվի կողմից բուհի բնականոն գործունեությունն ու զարգացումն ապահովելու իրավունքի իրացման գործողությունները, միաժամանակ, պետք է փաստել, որ նախաձեռնված գործադուլն ու դասադուլն ազդում են ինչպես մայր բուհի, այնպես էլ Գյումրու մասնաճյուղի ուսումնական գործընթացների կազմակերպման արդյունավետության վրա։ ՀՊՏՀ Գյումրու մասնաճյուղը դիմում է ՀՀ Կառավարությանը՝ օրենքով սահմանված կարգով սույն թվականի հուլիսի 17-ին ՀՊՏՀ ռեկտորի մրցույթի արդյունքները հաստատելու և ընտրված ռեկտորին սեղմ ժամկետներում իր պաշտոնում նշանակելու կոչով»,- ասվում է բուհի տարածած հայտարարության մեջ։

Էմմա Չոբանյան