30.06.2026 | 23:28
«Ուիմբլդոն»․ Կարեն Խաչանովը մեկնարկել է հաղթանակով
Զախարովայի մեկնաբանությունից հետո Բաքուն «խմբագրել է» Լավրովի՝ ԼՂ հակամարտության վերաբերյալ հայտարարությունը
Քաղաքականություն
24.09.2020 | 15:12
Ռուսաստանի ԱԳՆ պաշտոնական ներկայացուցիչ Մարիա Զախարովայի՝ Ադրբեջանի Միլի Մեջլիսի կողմից Սերգեյ Լավրովի խոսքերը ոչ ճիշտ մեկնաբանելու մասին հայտարարությունից հետո Բաքվում փոխել են Մոսկվայում ՌԴ արտաքին գերատեսչության ղեկավարի հետ Ադրբեջանի խորհրդարանի խոսնակ Սահիբա Գաֆարովայի հանդիպման վերաբերյալ հրապարակված հաղորդագրության տեքստը, գրում է EADaily-ն։
Մասնավորապես, Ադրբեջանի Միլի Մեջլիսի կողմից հրապարակված տեքստում նշվում էր, որ Սերգեյ Լավրովը, իբր, հայտարարել է, թե Նիկոլ Փաշինյանի՝ ԼՂ հակամարտության կարգավորման վերաբերյալ արտահայտությունները խոչընդոտում է հակամարտության կարգավորումը։
«Լեռնային Ղարաբաղի վերաբերյալ Փաշինյանի հայտարարությունները խոչընդոտում են հակամարտության կարգավորման գործընթացը։ Սա պաշտոնական Մոսկվայի դիրքորոշումն է։ Ռուսական կողմը կարգավորման գործընթացում կողմ է հանդես գալիս Ադրբեջանին հինգ գրավյալ շրջանների վերադարձին, խաղաղապահների տեղակայմանը և տրանսպորտահաղորդակցային համակարգի վերականգնմանը»,- Ադրբեջանի խորհրդարանի կայքում հրապարակված տեքստի համաձայն՝ իբր ասել է ՌԴ ԱԳ նախարարը։
Ավելի ուշ ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է իրավիճակը՝ «խորհուրդ տալով հիմնվել բացառապես Մոսկվայի դիրքորոշման վրա, այլ ոչ մեկնաբանությունների, որոնք արվում են ոչ ռուսական կողմից»։ Զախարովան անգամ չի ցանկացել կանգ առնել Ադրբեջանի կողմից տարածած ստահոտ լուրերի վրա։
Այս հայտարարությունից հետո Ադրբեջանի խորհրդարանի պաշտոնական կայքում հաղորդագրության տեքստը հիմնովին փոխվել է։
«Սերգեյ Լավրովը Լեռնային Ղարաբաղի հակամարտության հետ կապված հայտարարել է, որ Ռուսաստանը, որպես ԵԱՀԿ Մինսկի խմբի համանախագահ, աջակցում է խնդրի լուծմանը և ջանք չի խնայում այդ ոլորտում։ Ռուսաստանը սատարում է Ադրբեջանի տարածքային ամբողջականությունը», – ասվում է ադրբեջանական կողմի հրապարակած խմբագրված հաղորդագրությունում։
