Ես երկար տարիներ Գալոյանին գիտեմ. Մ. Մելքումյանը որպես ՀՊՏՀ կոլեկտիվի անդամ մասնակցում է ակցիային. ՏԵՍԱՆՅՈՒԹ

Հայաստանի Տնտեսագիտական պետական համալսարանի կոլեկտիվի պահանջն արդարացի է: Այս մասին այսօր լրագրողների հետ զրույցում ասաց ԱԺ ԲՀԿ խմբակցության պատգամավոր Միքայել Մելքումյանը, որը, որպես ՀՊՏՀ կոլեկտիվի անդամ, մասնակցում է Կառավարության դիմաց իրականացվող բողոքի ակցիային:

«Կոլեկտիվն ասում է՝ դուք, որպես օրինական Կառավարություն, ձևավորել եք խորհուրդ, էդ խորհուրդն օրինական ընտրել է ռեկտոր՝ Դիանա Գալոյանին, բայց անցել է երկու ամսից ավելի, իսկ Կառավարությունը նրան չի նշանակում ռեկտորի պաշտոնում: Ո՞րն է խնդիրը: Դրա համար էլ կոլեկտիվը եկել է այստեղ և բողոքում է, որ բուհը չի կարող այսպես անորոշության մեջ ապրել: Իսկ այս տարի բուհի ընդունելության մեծ ծավալ ունեցանք, մեծ թվով մարդիկ ընդունվեցին, այսինքն՝ գործընթացները դրական հունի մեջ են: Հիմա Կառավարությունն ուղղակի պետք է իր կողմից ձևավորած խորհրդի որոշմանը տեր կանգնի»,- ասաց Մելքումյանը:

Դիտարկմանը, թե ԲՈԿ-ը Դինա Գալոյանի աշխատության մեջ խնդիրներ էր տեսել, անգամ զրկել էին կոչումից, Միքայել Մելքումյանն արձագանքեց․ «Նախ՝ դա այլ խնդիր է և կապ չունի ռեկտորի ընտրության կամ նշանակման հետ: Բացի այդ, մյուս պետական մարմինն էլ չեղյալ է արել այդ որոշումը: Այսինքն՝ երկու պետական կառույցներ տարբեր որոշումներ են կայացրել: Կառավարության համար դժվա՞ր է լուծել խնդիրը»:

«Ես երկար տարիներ Գալոյանին գիտեմ, կարող եմ ասել, որ Գալոյանը բարեխիղճ, մակարդակ ունեցող գիտնական է, հենց այնպես չէր կարող գալ»,- հավելեց Մելքումյանը։

Մանրամասները՝ տեսանյութում: