12.10.2026 | 11:51
Ռուսական զորքերը հարվածել են Խարկովի բազմահարկ բնակելի շենքին․ տուժածներ կան
ԵՄ-ն կրկին չի կարողացել որոշում կայացնել Մինսկի դեմ պատժամիջոցների հարցով
Քաղաքականություն
21.09.2020 | 20:20
Եվրամիությունը դարձյալ չի կարողացել որոշում կայացնել Բելառուսի իշխանությունների դեմ պատժամիջոցներ սահմանելու հարցով։ ԵՄ աղբյուրը DW-ի թղթակցին հայտնել է, որ սեպտեմբերի 21-ին Բրյուսելում ԵՄ Խորհրդի նիստում պատժամիջոցները չեն հաստատվել։
Գործակալության զրուցակիցը, միաժամանակ, ընդգծել է, որ ԵՄ անդամ բոլոր պետությունների ԱԳ նախարարները վստահ են Մինսկի դեմ պատժամիջոցների անհրաժեշտության հարցում։
AFP-ն իր հերթին փոխանցում է, որ նիստի մասնակիցները չեն կարողացել համաձայնության հասնել Կիպրոսի դիրքորոշման պատճառով, որը պահանջում է նաև սահմանափակումներ սահմանել Թուրքիայի դեմ՝ Միջերկրական ծովի արևելյան հատվածում գործողությունների համար։
Մինչ այդ, ԵՄ երկրների ԱԳՆ ղեկավարները հանդիպել են Բելառուսի նախագահի նախկին թեկնածու Սվետլանա Տիխանովսկայայի հետ։ ԵՄ արտաքին գործերի և անվտանգության քաղաքականության հարցերով գերագույն հանձնակատար Ժոզեպ Բորելն ասել է՝ նա ԵՄ ներկայացուցիչներին տեղեկացրել է Բելառուսում տիրող իրավիճակի մասին։
«Մեզ իսկապես ապշեցնում է բելառուս ժողովրդի քաջությունն ու համառությունը, հատկապես՝ կանանց, որոնք իրական առաջնորդական որակներ են ցուցադրում»,- ասել է Բորելը՝ հավելելով, որ ԵՄ-ն Լուկաշենկոյին չի ճանաչում որպես Բելառուսի օրինականորեն ընտրված նախագահ։
Գերմանայի ԱԳ նախարար Հայկո Մաասն էլ կոչ է արել Ալեքսանդր Լուկաշենկոյին «սև ցուցակում» ներառել՝ նշելով, որ անցած շաբաթների ընթացքում իրավիճակը չի բարելավվել, իսկ «բռնությունը, որը Լուկաշենկոն կիրառում է խաղաղ ցուցարարների նկատմամբ, բացարձակ անընդունելի է»։
